Kritika e fortë vjen një javë përpara se presidenti Recep Tayyip Erdogan të vizitojë Uashingtonin për takimin e tij të parë me presidentin amerikan, Donald Trump, i cili miratoi furnizimin me armatime në mbështetje të një fushate për të rimarrë qytetin sirian Raqqa nga Shteti Islamik.
Turqia i konsideron militantët e “YPG”-së në Siri, si zgjatim të Partisë së jashtëligjshme të Punëtorëve të Kurdistanit (PKK), që ka zhvilluar një kryengritje në juglindje të vendit që prej vitit 1984 dhe konsiderohet gjithashtu grup terrorist, veç Turqisë, edhe nga Shtetet e Bashkuara dhe Europa.
“Duam të besojmë se aleatët tanë do të preferojnë të vihen në anën tonë, e jo në krah të organizatave terroriste”, tha Erdogan në një konferencë për shtyp në Ankara, duke shtuar se do të përcillte qëndrimin e Turqisë përballë Trumpit javën e ardhshme dhe në samitin e NATO-s, më vonë gjatë këtij muaji.
Ai tha gjithashtu se, shpreson që vendimi i marrë nga amerikanët të ndryshohet deri në momentin që ai do të vizitojë Shtetet e Bashkuara.
Më herët, kryeministri Binali Yildirim u tha reporterëve se, dështimi i SHBA-ve për të marrë në konsideratë ndjeshmërinë e Turqisë “do të ketë padyshim pasoja dhe do të sjellë rezultate negative edhe për vet Amerikën”.
Shtetet e Bashkuara i konsiderojnë luftëtarët e “YPG”-së si partnerë të vyer në luftën ndaj militantëve të Shtetit Islamik në veri të Sirisë. Uashingtoni tha se armatimi i forcave kurde është i domosdoshëm për rimarrjen e bastionit të ISIS në Siri, Raqqa, si dhe nyja e të gjitha planeve për sulme kundër Perëndimit.
Ky argument ndikon shumë pak, për të mos thënë aspak, tek Ankaraja, e cila është e shqetësuar se avancimet e kurdëve sirianë në veri të Sirisë mund të nxisin kryengritjen e PKK-së në tokën turke. Sipas ministrit të Jashtëm të Turqisë, armatimet e dhëna për “YPG”-në në të kaluarën kanë përfunduar në duart e militantëve të “PKK”-së.
