“Ne dhe Kina 1.5 bilion”, brohorit vetë me vete kryeministri Rama! Kur ishin shtatëqind milionë, sheep-ja këndonte me mburrje, për unitetin e pathyeshëm. Natyrisht, unë po spekuloj, se veç një zot e di se çka e ngazëllen kryeministrin. Vetëm ideja e ngazëllimit, për ne në Kosovë, të cilët njihemi si totalisht të (ndër)kombëtarizuar, na lëndon shumë! Edhe Kina na zuri në befasi!
Po na vë para aktit të kryer! Jo se nuk po arrijmë të korrigjojmë ende të kaluarën, por as të ardhmen… e ndritshme! Sidoqoftë, për të gjitha pasojat, para historisë, i vetmi përgjegjës do të mbetet Edi! Përgjegjësi penale dhe morale, nuk ka! Por, historianët me raste, sidomos solemne, do të përmendin emrat e tyre. E këta do t’i ndjekë lemza, kudo që të jenë!
E ne, konform rrethanave, nuk na ka mbetur tjetër, veç t’i shpallim luftë Kinës. Miqtë në mes vijnë prej fundit të botës dhe po duan të na marrin Shëngjinin, përpara hundësh! Kështu inatosen kosovarët dhe nën vrullin luftarak e përmbysin… gotën! Nga dëshpërimi!
Pra, situata në kuptimin politiko-emocional paraqitet pak a shumë kështu: dikur “Sala” ua fali Shëngjinin vëllezërve kosovarë, e tash Edi po ua fal atë vëllezërve kinezë. Jo se kosovarët e përdorën atë, por… ishte “lodra” jonë me të cilën na mashtroi Salua, kur po qanim! Edhe kryeministri kosovar e fali aeroportin dhe distribucionin, te vëllezërit turq. “Trepçën” po e mbajnë peng vëllezërit serbë. Rrush prej vëllezërve. Jemi familje e madhe!
Ndoshta kinezët, të llastuar pas bumit ekonomik, mund të thonë: duam Sarandën, apo Durrësin, jo Shëngjinin?! Kush e do veriun? Këtu bashkohen me Maks Velon! Urrejtja e tyre për veriun mund të lexohet veç si një formë se si “ata” e shprehin dashurinë! Kështu shpëtojmë të gjithë.
Sidoqoftë, fjalën e (para) fundit e thotë Parlamenti! Pastaj, në fund fare, Kushtetuesja! Edhe Shqipëria ka kushtetuese, sikurse edhe Kosova. Por pa ndërkombëtarë! Vetë shqiptarët përfaqësojnë shtete të ndryshme. Parlamenti, si organi më i lartë i pushtetit, është i paparashikueshëm, sikurse edhe vetë qytetarët! Ndërkohë që kush e ka shumicën në Kushtetuese, ai është pushteti!
Po mendoja se ndoshta më e lehtë do të ishte t’i shpallim luftë Shqipërisë! Kina mund të mos e pranojë sfidën! Frika është e natyrshme për një superfuqi! Pastaj edhe përgjegjësia. E ne, sloganin “Shqipëria është Kosovë” mund ta vendosim në hyrje të Kalimashit! Tuneli ynë!
U pa puna, po e pushtojmë, Shqipërinë! Më së lehti e kemi verës! Por, a pushtohet Shqipëria nga shqiptarët, or vëlla?! Shqiptarë ka mjaft edhe atje, por nuk po e pushtojnë dot, tash e njëqind vjet?!
Ok, e zëmë se e pushtuam? Pastaj? Edhe Shqipëria do të bëhej jofunksionale, sikurse Kosova dhe do të hyjë dhe nën patronatin ndërkombëtar! Edhe atje do të sundonin minoritetet, sepse shumica, për diçka do të jetë vazhdimisht e dyshimtë! Sidomos për shqiptarizëm! Por, pa dert! Këtë askush nuk mund ta dëshmojë.
E, strategjia jonë, duhet të jetë konspirative. Për të mund të debatohet vetëm në rrjete sociale. Kështu, të gjithë mendojnë se është shaka! Operacioni i koduar “Lakuriq” tregon se duhet maskuar, si turist! E kur në Tiranë të bëhemi rreth një milion kosovarë, nuk mbetet tjetër veç ta zgjatim dorën e t’i marrim institucionet. Ne e kemi dëshmuar se dimë me institucionet. I bëjmë (jo)funksionale.
Pastaj, gjithnjë e mbajmë rezervë edhe deputetin më të vjetër. E respektojmë edhe Kushtetuesen! Kushtetutën nuk e kemi lexuar! Pse ta lexojmë kot! Krejt është çështje interpretimi! Gjykatësi amerikan dha dorëheqje sepse e pranoi se nuk ishte mjaft i mençur për ta kuptuar Kushtetutën tonë të komplikuar. Ekspertët vendorë kanë shkruar Kushtetutën perfekte!
Se na iku vegëza! Pas kthimit të Edit nga Pekini, hit i javës do të jetë kënga “Ne dhe Kina 1.5 bilion”!
Të mos na e prek kush Kinën… se vdesim të tërë! Pak a shumë, kështu do të këndojnë reperët zyrtarë, në standard! E ku ka “rep” në standard, pash bukën?!
Por, anash emocionet nga e kaluara… Kina është superfuqi ekonomike dhe ne i duam superfuqitë. Me kë të bëhemi ne, ai bëhet superfuqi! Historia jonë është dëshmitare. A nuk u bëmë një herë me Romën, Stambollin, Moskën, Pekinin, Uashingtonin, Brukselin dhe prapë… Kinën!
Nuk mendoj se ka diçka të keqe në këtë biznes, sepse Kina komunisto-kapitaliste e do një port në Ballkan, në kohën kur transporti detar është gjithsesi kryesori në tregtinë globale, por … më kapluan emocionet, or vëlla! Në Shëngjin, nuk do të ndihem më si në shtëpi. Do të ndihemi sikur në Kinë.
S’ka dyshim se duhet ndërruar strategjinë. Po na e morën Shëngjinin, fillimisht duhet pushtuar Vlora dhe aty të ngrihet flamuri kuqezi! Ai i kombëtares! 100 metra! Ta shpallim Shqipërinë të bërë dhe të mosvarme. Në kohën kur edhe zogjtë kërkojnë një kabllo interneti për të pushuar pak krahët e lodhur, ne do të shpallim pavarësinë dhe do të këndojmë për Salon që e fali dhe Edin që e mori, Shëngjinin! Krejt është epikë! Se zogjtë e tanë nuk janë çfarëdo! Fillimisht shqiponja! Pastaj edhe… Tuna!
Por, zgjidhje ka! Ne duhet të lidhim aleancë me Indinë. 2-300 milionë më pak nuk luajnë rol! Është fuqi India! Pastaj veç ata kanë durim të merren me komplekset tona. Kështu, i madh e i vogël do të ushtrojmë Yoga! Fillimisht, kjo na duhet për ta duruar vetveten. Pastaj për ta kuptuar vetveten. Pastaj për t’u lëshuar teposhtë Bjeshkëve të Nemuna e drejt në Vlorë!
Përnjëmend, më thoni, kush i pati nëmur këto Bjeshkët e Nemuna? Kur serbët ikën e kuptova që fajtore paskan qenë… patatet! E vetmja luftë që kishim ishte… luftë patatesh!
E ka kuptuar Edi! Kina është zgjidhja! Aq sa hamë ne patate për një vit, ata i qërojnë për dhjetë sekonda! Lobing, njeri, lobing! Për “çështjen”!
Kështu, ata me Kinën, e ne me Indinë! Edi biznesin e ne durimin! Edi do të shkojë në Beograd së shpejti, e pastaj në Pekin! Apo ishte anasjelltas? Do të lobojë edhe për Kosovën! Krejt bëhet për “çështjen”!
Gjeopolitika është hartë, më thoshte një miku im, autor i një libri në shqip, për gjeopolitikën! Pra, hartat përpara, o njerëz! Kujt po i biem: Tiranës apo Pekinit?
Nuk durohen tash analistët! Do të spekulojnë me javë për mundësitë! Kush po fiton? Unë them… të presim!
