Analisti Nexhmedin Spahiu, thotë se qëllimi i protestave të së dielës në Mitrovicë nuk ishte heqja e barrikadës, por rrënimi i institucioneve lokale, djegia e Komunës për të fshehur provat e korrupsionit të disa drejtorive dhe kryetarit të Komunës gjatë mandatit të kaluar.
“Ky qëllim nuk u arrit, falë reagimit goxha profesional të KFOR-it, EULEX-it dhe Policisë së Kosovës”, ka thënë Spahiu për Indeksonline.
Sipas tij, heqja e barrikadës të quajtur “Parku i paqes” nuk ishte në interes të mafias në të dy anët e Mitrovicës.
“Të dy palët kontribuuan që barrikada te rivendoset. Fakti që përgjegjësinë e mori kryetari i Komunës veriore të Mitrovicës, Goran Rakic, e bënë atë një kloun politik. Cinizmi i tij që barrikadën e re e quan “Parku i paqes” është cinizëm kulmor që i shërben për turp atij dhe Beogradit”, ka thënë Spahiu.
Ai ka shtuar se kryetari i Mitrovicës, Agim Bahtiri e ka kuptuar vonë se cak i protestës ishte ai dhe jo barrikada.
“Me deklaratat e tij te pamatura ai kontribuoi që organizatoret ta kamuflojnë qëllimin e vërtetë”, ka thënë ai.
“Tani që Agim Bahtiri e ka kuptuar këtë gjë nuk po mund ta thotë se kush i organizoi protestën dhe kundër çkafit. Ndoshta jo pse i mungon guximi, por pse po i vjen marre me pranu se ka rënë në grackën e kundërshtarëve të tij politik”, ka thënë në fund Spahiu.
Edhe pse ende nuk kanë dalë me të dhënat zyrtare, dëmet nga dhuna në protestën e së dielës janë dhjetëra mijëra euro. Më të atakuar kanë qenë veturat e Komunës së Mitrovicës dhe të ATK-së. Policia po i vazhdon hetimet.
“Janë 6 vetura të institucionet, të cilat u dogjën të dielën në protestë: 1 veturë e Policisë së Kosovës, 2 të EULEX-it, 1 të UN-it dhe 2 të Administratës Tatimore të Kosovës”, ka thënë zëdhënësi i PK-së për rajonin e Mitrovicës, Avni Zahiti.