Personaliteti dhe karakteri i Nënë Terezës është kthyer në një tjetër vepër arti. Busti reflekton mbi humanitetin dhe dashurinë e saj për njerëzit. Mal Myrtaj, skulptor, thotë se pasi jeton në Gjermani ka menduar sesi do të mundë të punonte skulpturë të ndonjë personaliteti shqiptar, që do të pranohet nga pala gjermane dhe nga ajo shqiptare. Ai tregon për “Zërin” se ka menduar të punojë edhe Skënderbeun e personalitete të tjera, por është vendosur për bustin e Nënë Terezës. “Këtu duhet të kalohen disa lloje të provimeve se për cilin personalitet është fjala”, ka thënë Myrtaj. Ai tregon se për herë të parë ka dëgjuar nga shoqata “Rinia”, në Gjermani, ka iniciuar vendosjen e bustit të Nënë Terezës në Singen. “Atëherë, unë e kam punuar me gjithë dëshirë dhe e kam ditur që do të ketë sukses edhe Shoqata si shoqatë, edhe unë si krijues, sepse pala gjermane nuk do e kundërshtojë këtë punë”, ka thënë skulptori, duke treguar se pala gjermane e ka mirëpritur idenë.
Mal Myrtaj thotë se si krijues ka pasur dëshirë kaherë që ta punojë bustin e Nënë Terezës, por vetëm tani i është dhënë mundësia. “Jam munduar ta punoj një bust, i cili paraqet personalitetin, karakterin e Nënë Terezës”, është shprehur Myrtaj. Ai thotë busti nuk e paraqet Nënë Terezën në moshë të shtyrë, pasi shumë njerëz e mbajnë në mend ashtu. “Unë e kam bërë bustin e Nënë Terezës, diku kur ishte në moshën 50-vjeçare. Kam mbi një qind fotografi të Nënë Terezës nga fëmijëria e saj deri më moshë të shtyrë”, ka treguar skulptori Myrtaj, i cili thotë se ka bërë një bust që e paraqet Nënë Terezën pak më të fortë. “Qafa, rrudhat në fytyrë, nuk janë rrudha plake, por janë rrudha të forta, sepse puna e saj ka qenë e fortë. Ka punuar me krenari për njerëzit e varfër”, ka thënë Mal Murtaj, derisa flet për veprën e tij, e cila përurohet sot (e shtunë) në qytetin Singen të Gjermanisë.
“Ajo çfarë është më rëndësi, se kam mbledhur elemente nga gruaja, nëna shqiptare në përgjithësi, kam marrë elemente nga mbretëresha Teuta. Të gjitha këto janë bërë bashkë dhe ka dalë portreti i humanistes”, është shprehur Myrtaj, teksa ka treguar se njerëzit që e kanë parë deri më tani u ka pëlqyer vepra e tij, ndërsa të shtunën (sot) do të marrim përshtypjet e njerëzve që do të jenë të pranishëm. “Si shtet i vogël që është Kosova duken problemet e saj. Si shtet i vogël problemet e saj janë të mëdha. E duke i ditur këto, ne në Perëndim nuk e kemi gjendjen e mirë. Kohëve të fundit këto gjërat fetare, që po ndodhin pa nevojë, sikur e kanë zbehur paraqitjen e shqiptarëve këtu”, ka thënë Mal Myrtaj, i cili është i mendimit se busti është një vepër, e cila do të mirëpritet. “Dhe në njëfarë forme do të ndikojë pak a shumë të forcohet imazhi i shqiptarëve, pasi është figura e Nënë Terezës”, ka treguar Myrtaj.
Myrtaj ka treguar se është diskutuar gjatë se ku do të vendoset busti. “Kemi kërkuar disa vende nëpër qytet, nëpër parqe, me vende të tjera si më të përshtatshme për vendosjen e bustit”, ka thënë Mal Myrtaj, teksa ka thënë se ka qenë edhe frika nga pala gjermane, pasi njëri nga parqet që u mendua të vendosej busti vizitohet nga të rinjtë, të cilët përdorin alkool dhe me shishe do të mundë ta dëmtonin. Ai thotë se pastaj kanë menduar për në qendër, por pastaj është thënë se në qendra është vend ku njerëzit dalin për të blerë gjëra dhe nuk janë shumë të interesuar për vepra.
“Kështu u vendos në një park shumë të madh, që është i shkëlqyeshëm, pranë Spitalit të Singenit, përkatësit tek Klinika e Fëmijëve”, ka thënë Mal Myrtaj, duke shtuar se vendosja e bustit para Klinikës së Fëmijëve Hegau Bodensee, përputhet edhe me misionin e Nënë Terezës. “Pas mbledhjeve që janë bërë në komunë, është marrë ky vendim. Është një vend që vizitohet nga shumë njerëz. Është një vend jashtëzakonisht i bukur”, ka thënë skulptori nga Kosova, i cili jeton dhe vepron në Gjermani.
Ai thotë se është shumë i kënaqur me lokacionin që është përzgjedhur për vendosjen e bustit të Nënë Terezës. Pas kësaj ishte në tjetër detyrë për ata që kishin marrë përsipër këtë mision. Kërkoheshin të holla për punimin e bustit. “Janë organizuar grupe të njerëzve, familja Gojani, Haka, familja Hajdari dhe disa familje të tjera, të cilët filluan t’i mblidhnin të hollat”, ka treguar Mal Myrtaj, pasi busti duhej të punohej në bronz. “U mblodhën diku 20 mijë euro”, thotë ai. Në firmën ku punon Myrtaj është siguruar guri që kap shumën prej rreth 8 mijë eurove. “Ne të enjten kemi vendosur bustin, e kemi mbuluar që të jetë gati për të shtunën (sot)”, ka thënë Myrtaj, derisa ka treguar përmasat e bustit të Nënë Terezës.
“Busti është 80 centimetra lartësi dhe 70 centimetra gjerësi, 60 centimetra është thellësia, pasi është tredimensional”, është shprehur Mal Myrtaj, për bustin në të cilin ka punuar gjatë. “Kam punuar kohë pas kohe në të, punimet kanë zgjatur diku rreth tre muaj”, ka thënë skulptori, derisa ka treguar dimensionet e gurit në të cilin do të vendoset busti i Nënë Terezës. “Guri është rreth një metër e 30 centimetra lartësi dhe në përgjithësi busti nga baza poshtë, që është një gurë i shkëlqyeshëm graniti, që e ka emrin “Himlaja” nga Bjeshkët e Himalajës, është në lartësi 2 metra e 10 centimetra”, është shprehur Mal Myrtaj.
Myrtaj thotë se njerëzit që e kanë parë bustin, e kanë parë si një lloj befasie për të mirë. “Një mik i imi doktor e ka parë në formë pak më mashkullore, pasi busti ka dalë pak më i fortë. Pasi e ka kërkuar në internet dhe ka parë me qindra fotografi të Nënë Terezës, e ka parë që Nënë Tereza e ka pasur edhe një forcë të madhe të një mashkulli dhe atëherë më tha, tani e vërtetova që e ke punuar një grua siç ka qenë”, është shprehur Murtaj, derisa tregon të tjera përshtypje të miqve të tij. “Një psikolog, i cili më vizitoi në atelie, më ka thënë se kur e shikoj Nënë Terezën, më duket se më shikon mua. Kolegë të mi, skulptorë, që kanë ardhur në atelie e kanë parë Nënë Terezën në mëngjes kur i ka rënë dielli dhe me thanë se janë befasuar, sa kanë menduar se Nënë Tereza po flet me ta”, ka thënë Mal Murtaj, i cili ka treguar se të pranishëm në përurimin e bustit do të jetë kryetari i Komunës së Singenit, Bernd Häusler, si dhe konsulli i Republikës së Kosovës në Shtutgart, Faket Kajtazi, të cilët do ta bëjnë edhe zbulimin e bustit të Nënë Terezës. Siç ka thënë Mal Myrtaj bekimin e bustit do ta bëjë prifti Bernhard Knobelspies nga Famullia Katolike në Singen. Krahas kësaj do të ketë edhe një program muzikor i përgatitur nga Shkolla Muzikore e të rinjve në Singen.
Përveç kësaj, Mal Myrtaj është duke vazhduar punën në atelienë e tij. Ai thotë se është fokusuar në artin modern. “Jam duke punuar në një lloj ekspresionizmi. Punoj atë që e ndjej brenda”, ka treguar skulptori i cili ka mbi 30 skulptura në Kosovë, mbi 100 të tilla në Gjermani.
Ndonëse në shtete të ndryshme janë ekspozuar veprat e Mal Myrtajt, i cili ka marrë disa çmimet për veprat e tij dhe është anëtar i disa shoqatave në Kosovë dhe jashtë saj, vetëm në vitin 2013 ai ka hapur ekspozitën e tij të parë personale nën titullin “Simfoni në Bronz”.
