Grupet e interesit ankohen se ministria e Shëndetësisë nuk është këshilluar me ta në hartimin e projektligjit për barnat
Shpërndarësit e barnave në Shqipëri thonë se duhet rishikuar projektligji i ri për shkak të mungesës së garancisë për sigurinë.
Diana Toma, presidente e Urdhërit të Farmacistit u paraqit për seancën dëgjimore në Komisionin e Kuvendit për Punën, Çështjet Sociale dhe Shëndetësinë.
Zonja Toma u tha deputetëve komisionerë se projektligji ka vetëm një nen për sigurinë e barnave dhe se nuk i garanton elementet e sigurisë.
Sipas zonjës Toma, ministria e Shëndetësisë më përpara se të hartonte ligjin, duhet të ishte këshilluar me grupet e interesit.
Ajo theksoi se “nuk jemi thirrur fare në tryezat e organizuara nga ministria e Shëndetësisë” dhe se “ligji kërkon që ne të ishim pjesë e grupeve të punës”.
Diana Toma shtoi gjithashtu se duhet ndrequr aqjo që e quajti “pasaktësi” në ndarjen e ligjit në pjesën për barnatoret (farmacitë) dhe barnat:
“Ne mendojmë se duhet ripunuar si pjesa që flet për farmacinë dhe farmacistin. Ligji i konsideron farmacitë si subjekte tregtare, por farmacitë nuk janë të tilla”.
Përfaqësuesi i Shoqatës së Farmacistëve, Roland Xhafaj tha se ministrit të Shëndetësisë, Ilir Beqja i është qartësuar problematika në të vetmin takim të zhvilluar.
“Me ministrin e Shëndetësisë jemi takuar vetëm një herë dhe 90 përqind e propozimeve tona nuk janë marrë parasysh. Kërkesat e Shoqatës së Farmacistëve janë në përputhshmëri me udhëzimet europiane”-tha zoti Xhafaj.
Problem serioz për shpërndarësit e barnave është mungesa e transparencës së ligjit dhe veçanërisht të kohëzgjatjes së regjistrimit (të barnave) deri në 3 vjet.
Sipas tyre, kjo rrezikon hyrjen në vend të barnave të paregjistruar dhe të falsifikuar për shkak të nevojave madhore në Shqipëri.
Kërkesë e shpërndarësve të barnave ishte mesatarizimi i çmimit të referencës për barnat e importit me 5 vendet e rakonit si dhe kompjuterizimi.
Gramoz Dudushi, shpërndarës barnash, tha se projektligji ka shume probleme dhe se duhet të rikthehet për ridiskutim.
Sipas tij, “projektligji nuk garanton as elementet e sigurisë së barnave”, ndërsa kujtoi se “udhëzimi europian ka të sanksionuar 36 nene për sigurinë e pacienteve dhe sigurisë së barnave, ndërsa projektligji që propozon ministria ka vetëm një nen për këtë”.
“Për problemet që paraqet edhe në planin ekonomik dhe planin e sigurisë ky ligj duhet rikthyer për diskutim me ekspertë teknik”-tha ai.
“Ky ligj edhe me arnime do të ishte një ligj i keq – shtoi Dudushi. – Projektligji për barnat krijon monopole”.
Qëndrimeve të shpërndarësve të barnave iu përgjigj prerë deputetja e Partisë Socialiste, mjeke me profesion, Klodiana Spahiu:
“Nuk jemi këtu për ta kthyer projektligjin, por për të dëgjuar sugjerimet dhe propozimet e tyre”!
