Prokuroria e Francës ka arritur në përfundimin se rrëzimi i avionit të Germanwings ishte një vetëvrasje e qëllimshme.
Një nga dy pilotët e ka çuar qëllimisht avionin drejt tragjedisë.
Sipas prokurorëve francezë, bashkëpiloti mori kontrollin e aeroplanit dhe nisi qëllimisht rënien.
Piloti sapo ishte larguar nga kabina dhe ai u la jashtë.
Sipas prokurorëve, bashkëpiloti ishte i gjallë deri në përplasjen finale.
Më herët ishte raportuar se një nga dy pilotët e avionit të Germanwings, që u rrëzua në Alpet Franceze, kishte mbetur jashtë kabinës së drejtimit.
Sipas BBC, të dhënat e para nga regjistruesi i zërit në kabinë sugjerojnë se piloti bëri përpjekje të dëshpëruara për të hyrë në kabinë, duke tentuar të thyejë derën.
NY Times raporton se piloti i ra fillimisht derës, por kur kolegu i tij nuk u përgjigj, tentoi që ta thyente derën.
Gjithçka ndodhi pak përpara se avioni të niste rënien, e cila zgjati tetë minuta.
Ndërkohë hetimet po vazhdojnë.
Avioni kishte 150 persona në bord.
Pas lajmit se një pilot ishte bllokuar jashtë kabinës, ekspertët e aviacionit thanë menjëherë për Mirror se këto të dhëna sugjerojnë se piloti i mbetur në kabinë e ka çuar qëllimisht avionin drejt një vetëvrasjeje masive.
Ewan Wilson tha se është një ngjarje shumë unike, që një pilot troket në derë dhe tjetri nuk ia hap derën, ndërsa më vonë avioni nis rënien pikiatë drejt thërrmimit.
Piloti i ngecur jashtë ka tentuar të shembë derën.
Ai mund të hynte me anë të kodit sekret, nëse piloti brenda do kishte humbur ndjenjat.
Por ekziston mundësia që piloti brenda e ka bllokuar aksesin qëllimisht.
“Pse avioni do binte ashtu pikiatë? Nuk ka pasur asnjë emergjencë të deklaruar,” pyet ai.
