Këshilli miratoi me shumicë votash për shkarkimin nga detyra të gjyqtarit Sh.Ll, dhënien e masës disiplinore “Vërejtje me paralajmërim për shkarkim nga detyra” ndaj gjyqtarëve me iniciale B.M dhe B.K si dhe pushimin e procedimit disiplinor për gjyqtaren me iniciale A.Z
Këshilli i Lartë i Drejtësisë miratoi në mbledhjen e sotme katër propozimet e Ministrit të Drejtësisë, Nasip Naço, për procedimin disiplinor për katër gjyqtarë, ndërsa ka shtyrë për seancën tjetër procedimet disiplinore për dy gjyqtarë të tjerë.
Këshilli miratoi me shumicë votash për shkarkimin nga detyra të gjyqtarit Sh.Ll, dhënien e masës disiplinore “Vërejtje me paralajmërim për shkarkim nga detyra” ndaj gjyqtarëve me iniciale B.M dhe B.K si dhe pushimin e procedimit disiplinor për gjyqtaren me iniciale A.Z, për të cilën Këshilli votoi unanimisht.
Në vijim të mbledhjes Këshilli vendosi shtyrjen e shqyrtimit të kërkesave për procedimin disiplinor për dy gjyqtarë, për shkak të pamundësisë së tyre për të marrë pjesë në procedim, për mbledhjen e ardhme që do të mbahet ditën e hënë datë, 21.07.2014.
Si pikë të fundit të rendit të ditës, Këshilli vendosi delegimin e disa gjyqtarëve në shqyrtimin e çështjeve të caktuara gjyqësore, në gjykata të tjera nga ku ata janë emëruar për të ushtruar funksionin e gjyqtarit.
“Në pesë nga gjashtë rastet në rend dite, konstatimi i shkeljeve të kryera nga ana e gjyqtarëve ka qenë iniciativë e Inspektoratit të Këshillit të Lartë të Drejtësisë, bazuar në verifikimin e ankesave të qytetarëve të mbërritura pranë këtij institucioni, ankesa të cilat konsistonin në: zvarritje e pajustifikuar e procesit gjyqësor (duke përfshire edhe vonesat e pajustifikuara ne zbardhjen e vendimeve), shkelje haptazi e ligjit procedural dhe moszbatim i vendimeve unifikuese.
Ndërsa për rastin e gjyqtarit Sh.Ll, procedimi disiplinor erdhi pas raportit të Inspektimit të përbashkët të Inspektoratit të KLD-së dhe Inspektoratit të Ministrisë së Drejtësisë”, thuhet në njoftimin e KLD-së.
