Shkeljet, ja 43 rastet kur policia u heq pikët e patentës shoferëve

Vendimi i qeverisë hyn në fuqi më 22 prill

20 pikë – Patenta e çdo shoferi ka një total prej 20 pikësh. Mbi bazën e kësaj bëhet dhe penalizimi i shkelësve

10 pikë – Hiqen nga patenta kur qarkullon me mjet nën ndikimin e lëndëve droguese ose psikotrope

10 pikë – Hiqen nëse nuk pranon të bëhet verifikimi i gjendjes psikofizike si pasojë e ndikimit të lëndëve droguese ose psikotrope

15 pikë – Hiqen nga patenta kur drejtuesi i mjetit nuk zbaton detyrimin e ndalimit në rast aksidenti me dëme në njerëz

Sistemi i ri i pikëve të patentës do të hyjë në fuqi më 22 prill. Ministria e Transportit dhe Infrastrukturës propozoi në mbledhjen e ditës së djeshme të Këshillit të Ministrave projektvendimin “Për miratimin e rregullores së zbatimit të Kodit Rrugor të Republikës së Shqipërisë, i ndryshuar, është një akt zbatues i nenit 120/1 të Kodit Rrugor”, në bazë të së cilit do të funksionojë sistemi i pikëve të lejeve të drejtimit. Sistemi i ri me pikë është unifikim i praktikave të vendeve të BE-së, i cili do të shërbejë për identifikimin dhe sanksionimin e kundërvajtësve të përsëritur të normave të sjelljes në trafikun rrugor. Nga 20 pikë që ka gjithsej patenta e çdo shoferi, qeveria ka përcaktuar rastet se kur ato hiqen në rast të shkeljeje, ku zbritja maksimale është 10 pikë. “Mbajtësi i lejedrejtimit që ka humbur totalin e pikëve dhe mbajtësi i lejedrejtimit, i cili, pas njoftimit të shkeljes së parë, që përfshin një humbje prej, të paktën, pesë pikësh, kryen edhe dy shkelje të tjera, brenda dymbëdhjetë muajve nga data e shkeljes së parë, që kanë të bëjnë me shkurtim prej, të paktën, pesë pikësh secila, duhet t’i nënshtrohet provimit të kualifikimit teorik në Drejtoritë Rajonale të Shërbimeve të Transportit Rrugor. Në rastet e përmendura në pikën 2, të këtij neni, mbajtësit i tërhiqet leja e drejtimit nga organet e Policisë Rrugore dhe, së bashku me vendimin për heqjen e pikëve, i dërgohen Drejtorisë së Përgjithshme të Shërbimeve të Transportit Rrugor. Rifitimi i pikëve, me anë të provimit të kualifikimit teorik, është i vlefshëm pas përfundimit të kohës së pezullimit të lejedrejtimit”, thuhet në pikat 2 dhe 3 të këtij vendimi.

Drejtoria e Përgjithshme e Shërbimeve të Transportit Rrugor përgatit dhe administron procedurat e regjistrimit dhe të dhënies së provimit të kualifikimit teorik. Tarifa e regjistrimit dhe e provimit të kualifikimit teorik miratohen nga ministri përgjegjës për Transportin, në bazë të statutit të Drejtorisë së Përgjithshme të Shërbimeve të Transportit Rrugor. “Pyetjet e provimit të kualifikimit përzgjidhen nga kapitulli 5, “Normat e sjelljes”, të Kodit Rrugor. Drejtoria e Përgjithshme e Shërbimeve të Transportit Rrugor përgatit strukturën dhe pyetjet e provimit të kualifikimit teorik, të cilat i publikon në faqen e saj të internetit, së bashku me përgjigjet respektive. Mbajtësi i lejedrejtimit fiton provimin e kualifikimit kur përgjigjet saktë, jo më pak se, 90 për qind të sasisë së pyetjeve””, thuhet në vendimin e qeverisë.

Shkeljet

Qarkullimi me mjet në gjendje të dehur do t’i kushtojë drejtuesit të automjetit heqjen e 8 pikëve nga patenta e tij. Nëse kjo përsëritet brenda një viti do t’i hiqen dhe 10 pikë të tjera. Gjithashtu, i njëjti penalizim përdoret dhe në rastet kur drejtuesi i mjetit nuk pranon të bëhet verifikimi i gjendjes psikofizike si pasojë e ndikimit të alkoolit. Ndërsa për dy shkeljet kur: Qarkullon me mjet nën ndikimin e lëndëve droguese ose psikotrope dhe kur drejtuesi i mjetit nuk pranon të bëhet verifikimi i gjendjes psikofizike si pasojë e ndikimit të lëndëve droguese ose psikotrope do t’i hiqen 10 pikë nga patenta. Në rast se kjo shkelje përsëritet brenda vitit, atëherë Drejtoria e Patentave do t’i heqë 15 pikë nga patenta shoferit. Ndërkohë që drejtuesi i mjetit që transporton fëmijë pa ndenjëse të posaçme do t’i hiqen tri pikë nga patenta. Në rast se shoferi qarkullon në korsitë e emergjencës pa motiv në autostrada dhe në rrugë interurbane kryesore ose me karakteristika të ngjashme, do t’i hiqen 8 pikë. Penalizim i rëndë është dhe për rastet kur drejtuesi i mjetit nuk pranon të paraqesë dokumentin e qarkullimit, lejedrejtimin dhe çdo dokument tjetër që duhet të ketë me vete. Me 15 pikë i hiqen nga patenta kur drejtuesi i mjetit nuk zbaton detyrimin e ndalimit në rast aksidenti me dëme në njerëz. Kjo është dhe heqja më e madhe e pikëve që parashikohet në vendimin e qeverisë.

Mbjellja e pemëve

Gjithashtu janë përcaktuar dhe rastet kur lejohet mbjellja e pemëve në rrugët nacionale, duke përcaktuar kriteret më të qarta të respektimit të distancës. “Në rastet kur pemët mbillen si elemente të trupit të rrugës, në funksion të rehabilitimit të gjelbërimit të skarpatave të rrugës, pemët mbillen në brezin e përkatësisë, jashtë bankinës, pa cenuar sinjalistikën vertikale rrugore. Largësia nga kufiri rrugor, jashtë qendrave të banuara, që duhet respektuar nga pronarët e terreneve në kufi me pronësinë rrugore, për të mbjellë pemë anash rrugës, nuk mund të jetë më e vogël sesa lartësia më e madhe e arritshme, për secilin tip, e rritjes, deri në plotësimin e ciklit vegjetativ”, thuhet në vendimin e qeverisë.