Faturat e papaguara të energjisë elektrike i kanë kushtuar vendin e punës edhe kreut të Zyrës Arsimore në Malësinë e Madhe, Vlash Linadi. Burime zyrtare nga Ministria e Arsimit bëjnë të ditur se “pas verifikimit të të gjithë dokumentacionit të paraqitur nga DAR Shkodër dhe ballafaqimit të tyre me të dhënat e dërguara nga OSHEE, rezulton se drejtori i Zyrës Arsimore të Malësisë së Madhe, z. Vlash Linadi, është debitor në masën 130,490 lekë ndaj operatorit të shitjes së energjisë elektrike”.
Nisur nga ky konstatim, Ministrja e Arsimit dhe Sportit, Lindita Nikolla, ka propozuar shkarkimin e Vlash Linadit, sipas procedurave ligjore për shkelje të etikës dhe mos zbatimit të Urdhrit të Ministres së Arsimit dhe Sportit.
“Ministrja e Arsimit dhe Sportit, i bën thirrje të gjithë trupës së punonjësve në sistemin arsimor se detyrimi për pagesën e energjisë elektrike është një detyrim ligjor, pasi në një shtet të së drejtës, në një vend demokratik, të gjithë janë të barabartë përpara ligjit. Kultura e zbatimit të ligjit duhet të fillojë që nga bankat e shkollave, me përfshirjen e mësuesve, pedagogëve, studentëve, prindërve dhe komunitetin. Vetëm kështu, duke edukuar qytetarë europian të një vendi europian, mund të kontribuojmë së bashku në ndërtimin e një të nesërme krejtësisht tjetër për vendin tone.”- thuhet në njoftimin e Ministrisë së Arsimit.
SHKARKIMI I ZV/MINISTRES
Pak ditë më parë, kryeministri Edi Rama ka shkarkuar nga detyra zëvendësministren e Mjedisit, Djana Bejko, pasi kjo e fundit ka rezultuar të jetë debitore për energjinë elektrike. Shefi i qeverisë ka marrë vendimin për të liruar nga detyra zv/ministren e Mjedisit, pasi ajo ka rezultuar të mos ketë paguar energjinë elektrike në shtëpinë e dytë që zotëron në Velipojë. Në Kryeministri është ngritur një ekip i posaçëm që verifikon bashkë me Operatorin e Sistemit të Shpërndarjes së Energjisë (OSSHE), librezat e punonjësve të administratës publike.“Borxhlinjtë” e energjisë elektrike që punojnë në administratën shtetërore nuk do të tolerohen nga Kryeministri Rama, i cili ka bërë zonjën Bejko “shembullin e parë” në rangjet e larta të qeverisë.
