Personat me aftësi të kufizuar dhe pensionistët kanë marrë sigurinë nga Kryeministri Edi Rama, se s’do të ketë rritje të çmimit të energjisë, por vetëm heqje të fashës prej 300 kilovat/orë. Rama i ka siguruar se operacioni kundër vjedhjes së energjisë elektrike, nuk ka kurrfarë lidhje me pensionistët dhe personat me aftësi të kufizura, por me ata që kanë abuzuar me vite në kurriz të fukarrenjve, ku kryesisht janë biznese. Kryeministri Rama theksoi se energjia është një mall si gjithë të tjerët që duhet paguar, pasi askush nuk blen, ujë apo bukë pa paguar.
“Fasha e famshme e 300 kv e cila është vendosur aty për tu mbrojtur ju po është kthyer në një mburojë e atyre që e vjedhin dhe që fshihen pas kësaj fashe. Ne jemi të vendosur ta heqim fashën sepse kemi pasur dy alternativa, të rrisim çmimin ose të heqim fashën. Të risim çmimin uniform pë të gjthë ose të heqim fashën”, tha kryeministri Edi Rama.
Pensionistët dhe personat me aftësi të kufizuara i kanë drejtuar disa pyetje kryeministrit, ku kanë kërkuar nëse do përfundojë në burg një pensionist që s’paguan, apo një invalid. Por Rama ka nënvizuar se vjedhjen e bëjnë bizneset dhe jo pensionistët. Sa i përket subvencionit, Rama ua bëri të qartë, se të tillë s’do ketë, por do të rriten pensionet dhe ndihma ekonomike, që të paguhet energjia.
“Nuk do të subvencionojme apo do të rimbursojmë apo bëjmë të njëjtën gjë që është bërë më përpara duke i lënë duarthatë dhe xhepat bosh ata për të cilët me demek është caktuar masa e subvencionit. Ne do të rrisim pensionet për penisonistët kryefamiljarë, jo të gjithë pensionistët. Do të rrisim ndihmën ekonomike, pagën tuaj që merrni mbështetje si persona me aftësi të kufizuar në mënyrë që askush të mos ketë asnjë problem për të paguar energjinë elektrike”, vijoi kryeministri.
Kryeministri deklaroi se nuk do të tolerohet askush që vjedh energjinë, pasi ai do të përballet me burgun. Ai shtoi se i duhet dhënë fund vjedhjes dhe shpërdorimit të energjisë elektrike dhe se kjo qeveri nuk do të bëjë gabimet e së shkuarës.
