Kryeministri Edi Rama ka kometuar qëndrimin e Presidentit Bujar Nishani, për mosdekretimin e Visar Zhitit si ambasador në Vatikan. Në një qëndrim të tij, të cilin kreu i qeverisë e cilëson si “Ridënimi i Visar Zhitit”, Rama e vlerëson si një poet të rrallë, të burgosur politik të diktaturës dhe si një shqiptar të rrallë. Ai thotë se Visar Zhiti është i vetmi deputet e ministër i Partisë Demokratike që s’ka fyer kënd dhe as ka shpifur për askënd. “Një periudhë shërbimi në diplomaci me kontribut për kulturën. Botues i një volumi dinjitoz në italisht në nderim të Nënë Terezës. E propozojmë për ambasador të Shqipërisë në Vatikan. Një figurë lokale e kishës katolike shqiptare prononcohet me rezerva ndaj tij. Prononcim i papranueshëm për të cilin vetë ati në fjalë kërkon ndjesë publike. Komisioni i Jashtëm i Kuvendit i jep Visar Zhitit mbështetje pa asnjë rezervë. Vetë Selia e Shenjtë, përmes Nuncit Apostolik në Tiranë, na përcjell mirëpritjen më të ngrohtë për propozimin, me fjalët më të mira për kandidaturën.
Kandidatura është në tryezën e Presidentit të Republikës për firmë. Presidenti i Republikës, përmes një prononcimi për një emision lajmesh deklaron mosdekretimin e Visar Zhitit!”, shkruan Rama në profilin e tij në Facebook. Lidhur me argumentin e dhënë ngë Kreu i Shtetit, ai thotë se kandidati për ambasador i Republikës së Shqipërisë në Vatikan, paska cenuar kishën me një prononcim publik. Rama e cilëson prononcimin publik si të pafajshëm dhe, njësoj si poezitë e pafajshme dikur, por se rifabrikohet si arsye e lartë shtetërore për të ndëshkuar Visar Zhitin. Në vijim ai shton se është zotuar të mos i komentoj në publik kundërshtitë e tij ndaj Presidentit të Republikës, duke nënvizuar se Bujar Nishani është kalimtar, ndërsa Presidenti i Republikës është një institucion themelor i shtetit shqiptar, edhe pse shprehet se është i rrënuar nga Partia Demokratike në pushtet, njësoj si tërë shteti që ai pushtet la pas në 23 qershor.
Në këtë linjë Kryeminsitri shprehet se, “Por sot, unë nuk mund të hesht dot në asnjë mënyrë. Sepse ky është ridënimi i Visar Zhitit. Fatmirësisht më i lehtë se i pari. Sepse poeti nuk do të kyçet në burg; djali nuk do të shkëputet për së gjalli nga nëna; bashkëshorti nuk do të ndahet me përdhunë nga gruaja. E megjithatë, ky ridënim është fatkeqësisht më i hidhur se dënimi i parë. Sepse një i dënuar i diktaturës komuniste për lirinë poetike, nuk mund të ridënohet sot nga Presidenti i Republikës së Shqipërisë për qëllime politike”.
