Dorëheqjet e mbrëmshme të ministres së Punëve të Prendshme të Maqedonisë, Gordana Jankullovska dhe shefit të shërbimit sekret të këtij vendi, Sasho Mijallkov, kanë pasuar pas një takimi që ata kanë pasur në ambasadën e Shteteve të Bashkuara të Amerikës në Shkup.
Sipas burimeve të portalit Libertas, në këtë takim, Jankullovskës dhe Mijallkovit u janë dhënë regjistrime (incizime) nga kontaktet telefonike midis përfaqësuesve të Drejtorisë së Sigurisë dhe Kundëzbulimit (DSK) dhe grupit të armatosur, konkretisht me personin e quajtur “Komandant NATO” dhe njerëzit e tij.
Sipas burimeve, në regjistrime dëshmohet përfshirja e DSK-së, e cila ka biseduar me grupin e armatosur në Kumanovë.
“Shqiptarë të punësuar në DSK kanë kontaktuar përmes telefonit me grupin e armatosur, duke thënë se ata e kanë bërë këtë me urdhër direkt të shefit të DSK-së, i cili ka pyetur se çfarë kompensimi kërkojnë që të tërhiqen. Praktikisht MPB ka hyrë në bisedime me ta”, ka thënë burimi i Libertas, transmeton INA.
Paralelisht me këtë, lideri i BDI-së, Ali Ahmeti, në marrëveshje me partnerët e koalicionit, ka kërkuar ndihmë nga OSBE për të tërhequr tre persona të afërt me të që ishin pjesë e grupit, me të cilët do të negocionin më pas.
“Gjatë takimit të sotëm në ambasadën amerikanë, edhe Ahmetit iu bë e ditur se komuniteti ndërkombëtar, përmes këtyre incizimeve, e ka të qartë edhe përfshirjen e Qeverisë në ngjarjet në Kumanovë dhe se aksionin e përgjakshëm MPB-ja e filloi kur në terren tashmë e kishin humbur jetën disa pjesëtarë të forcave policore”, ka thënë burimi.
“Dorëheqjet që ndodhën pas takimeve mes ambasadorëve dhe zyrtarëve janë logjike”, ka thënë burimi diplomatik.
Sipas burimit, edhe kryeministri Nikolla Gruevski ka pasur informata për kontaktet e kushëririt të tij me grupin criminal, transmeton Express.
