Ata janë këmbëngulës se do të vazhdojnë me aksione dhe protesta deri në dorëheqjen e Adem Grabovit dhe atyre që përfituan nga veprimet e tij.
Ja fjalimi i plotë i një pjesëmarrëseje në aksion:
Quhem Edona Bajrami, jam qytetare e këtij vendi. I jam bashkuar grupit të qytetarëve #Protestoj, për të shprehur pakënaqësinë që kemi kundrejt sistemit të korruptuar politik.
Sot po e shpallim ashtu siç është dhe siç kanë dëshirë anëtarët e saj ta shohin, këtë organizatë ku ndodhet departamenti më i madh i korrupsionit në vend. Kjo është PDK, apo siç do ta njohim tash e tutje Pronto Departamenti i Korrupsionit. Arsyet për këtë shpallje janë të qarta besoj dhe nuk më duhet të sqarohem tutje.
Tani që gjithçka po shihet hapur është detyrë reagimi ynë si qytetarë në të mirën e këtij vendi.
Poashtu, ne e kemi dëgjuar me vëmendje të plotë deklaratën e Kadri Veselit, udhëheqës i Pronto Departamentit të Korrupsionit i cili u mundua ta relativizonte gjithë punën e përgjimeve dhe skandaleve të PDK-së. Është shqetësuese kur udhëheqësi i kësaj organizate, në vend se të turpërohet e të marrë masa që të paktën të duket më mirë para qytetarëve, ai duke e mbrojtur atë turp që ne mezi e dëgjojmë, na siguron se nuk e ka ndërmend ta bëjë një gjë të tillë. Por, ne do ta detyrojmë atë dhe secilin që është përfshirë ta marrë përgjegjësinë e vet. Protestat tona nuk do të ndalen derisa të arrihet drejtësia politike dhe institucionale, pra dorëheqjet e të përfshirëve dhe ndjekja penale e tyre.
Gjithashtu e pamë sot, Veseli ka qenë edhe vet i përfshirë në atë që ai u mundua ta relativizonte. Madje siç e tha edhe vet Grabovci, ai i jep urdhrat që në vitin 2011 kur janë bërë përgjimet. Ne pyesim: Çka na garanton se atë që ka bërë në të kaluarën .k po e bënë sot, apo se nuk do ta bëjë nesër?
Është shqetësuese, kur zyrtarët e kësaj partie në aferën PRONTO dëgjohen duke folur mes vete italisht, duke imituar kështu mafian italiane të filmave. Kjo na tregon qartë se këta që po e imitojnë mafian në fakt tregojnë se ajo që duan për veten e tyre është krijimi i një klani mafioz që mban nën kontroll çdo gjë. Prandaj, ne, qytetarët e këtij vendi, përmes angazhimit civil dhe paqësor do të kujdesemi që puna të mos mbërrijë deri aty, duke i dorëhequr e shkarkuar qysh tash, brenda pak javëve.
Ne qytetarët e #Protestoj, pa organizatë, pa parti, pa ndonjë institucion mbrapa nesh por vetëm me përgjegjësinë dhe vullnetin tonë qytetar do të vazhdojrnë të organizohemi deri në dorëheqjen e Grabovcit dhe atyre që kanë përfituar nga veprimet e tij.
Ftojmë qytetarët që të na bashkohen nesër në orën 17:00 te Sheshi Zahir Pajaziti. Ju faleminderit!
