Prokuroria nuk do të hetojë bisedat mes Kastriot Ismailajt dhe kreut të LSI-së, Ilir Meta. Abc News raportoi se vendimi i asgjesimit të tyre i bën të papërdorshme për procesin gjyqësor ndaj Ismailajt apo për një hetim tjetër.
Zyrtarisht Prokuroria e Përgjithshme hesht. Adriatik Llalla zgjodhi të mos prononcohet për përgjimet ndaj Kastriot Ismailajt dhe kreut të LSI-së Ilir Meta. Pavarësisht heshtjes zyrtare, burimet i thanë Abc Neës, se nuk do të ketë hetim për faktet e publikuara në media. Për këto përgjime ka një vendim asgjesimi dhe si të tilla, nuk mund të përdoren si prova materiale. Përveç mesazheve, në dosje kanë qenë të arkivuara edhe bisedat audio mes Ilir Metës dhe Kastriot Ismailajt, por këto janë asgjësuar tashmë.
Bisedat ndodhen në dosje vetëm të zbardhura në procesverbalin e transkriptuar dhe nuk përbëjnë elementë të proves, që mund të përdoren kundër të pandehurit, thanë prokurorët për AbcNeës.
Hetimet ndaj Kastriot Ismailajt në vitin 2008 nisën për akuzën e “pastrimit të parave”, sipas kallëzimit të Drejtorisë së Pastrimit të Parave në Policinë e Shtetit. Hetimet zgjatën për gati 4 vite. Kastriot Ismailaj u përgjua për rreth 18 muaj.
Pavarësisht bisedave të shumta kompromentuese dhe transaksioneve miliona dollarësh, që kompania Ismailajt bënte me vende të ndryshme, prokuruoria vendosi të pushojë hetimin penal në tetor të 2012. Të gjitha veprimet hetimore edhe zbardhja e përgjimeve telefonike janë bërë nga oficeri Lutfi Minxhozi. Ai sot mban detyrën e Shefit të Krimeve Ekonomike në Drejtorin e Përgjithshme të Policisë së Shtetit. I kontaktuar nga Abc Neës për faktet e publikuara në media dhe për mosreferimin e çështjes për vazhdim të hetimeve, Lutfi Minxhozi nuk preferoi të komentojë.
Por hetimet ndaj Ismailajt u hapën sërish me urdhër të kryeprokurorit Adriatik Llalla. Në prill të 2015 Kastriot Ismailaj u akuzua për skandalin me mbledhjen e borxheve të kompanisë CEZ.
