Brenda dy javësh, janë shënuar tri raste arrestimesh nga policia, të cilat janë konsideruar të paligjshme nga Prokuroria, që ka urdhëruar lirimin e menjëhershëm të të ndaluarve. Dy ndërtues dhe pesë zyrtarë të ALUIZNI-t, janë arrestuar me iniciativë nga policia, e cila nuk ka marrë miratimin e prokurorit. Sollaku: Policia po vepron si një bandë gjobëvënësish
Njohësit e Kodit të Procedurës Penale, e dinë se policia gjyqësore mund të kryejë arrestime në flagrancë ose me iniciativë, vetëm në rastet kur nuk ka mundësi objektive të komunikojë me prokurorin. Por ky atribut duket se po keqpërdoret nga policia, e cila në dy javët e fundit, ka kryer disa arrestime që janë konsideruar si të paligjshme nga institucioni i prokurorisë. Kjo “uri” e Policisë së Shtetit, duket se ka krijuar një përplase me institucionin e akuzës, i cili në disa raste është detyruar të firmosë lirimin e menjëhershëm të të arrestuarve, duke u përpjekur kështu të frenojë arrestimet e paligjshme të policisë. Por ka edhe raste kur prokuroria, edhe pse ka qenë kundër arrestimeve, është detyruar t’i pranojë ato, kur janë bërë fakt i kryer nga policia, madje ka kërkuar edhe arrest me burg për të ndaluarit. Një nga këto raste, ka qenë arrestimi i dy personave që rezultonin të ishin blerësit e kartave të telefonit, që u përdorën në bombën e vendosur në automjetin e biznesmenit Nuredin Suli. Prokurori ishte kundër arrestimit të Musa Çerpjas dhe Julian Hamollarit, të cilët do ishin më të vlefshëm për hetimin, në gjendje të lirë, por u detyrua të kërkojë masën e sigurisë “arrest me burg” ndaj tyre, pasi policia i arrestoi me iniciativë. Por krahas rasteve të ngjashme, dy javët e fundit vihet re një “luftë e ftohtë” mes institucioneve të policisë dhe prokurorisë, edhe pse drejtuesit e tyre thonë se marrëdhëniet janë korrekte dhe institucionale.
Zyrtarët e ALUIZNI-t
Në fillim të këtij muaji, policia njoftoi se kishte arrestuar 5 zyrtarë të ALUIZNI-t të Tiranës, si dhe kishte shpallur në kërkim dy ndërtues, të cilët kishin legalizuar në mënyrë të paligjshme disa ndërtime. Pa marrë miratimin e prokurorisë, policia kishte arrestuar me iniciativë, zyrtarët e ALUIZNI-t, edhe pse nuk kishte një akt-ekspertimi, që të tregonte se dokumentet e ndërtimeve, të futura për legalizim, ishin të falsifikuara. Ky operacion u paraqit si sukses nga ana e policisë, e cila publikoi emrat dhe funksionet e të arrestuarve, si dhe faktin se kanë qenë pronarët e truallit ata që kishin bërë kallëzimin. Sipas kallëzimit, pronarët e truallit ku ishin bërë ndërtimet, pretendojnë se ishin përjashtuar nga pjesa që u takonte, në bazë të pronës që ata kishin. Por nga verifikimi që prokuroria u bëri akteve të policisë, rezultoi se arrestimi ishte i paligjshëm, nuk ishin respektuar kriteret e parashikuara nga Kodi i Procedurës Penale, si dhe rasti për të cilën dyshohej, ishte tërësisht çështje administrative. Me vendim, organi i akuzës tha se arrestimet janë të paligjshme, duke urdhëruar lirimin e menjëhershëm të pesë zyrtarëve të ALUIZNI-t, si dhe shfuqizoi shpalljen në kërkim të dy ndërtuesve. Deri tani, për këtë rast nuk ka mbajtur përgjegjësi asnjë zyrtar i policisë.
Arrestimi i Ndërtueses
Më 17 shkurt, policia njoftoi se kishte arrestuar shtetasen Nadire Qinami, për ndërtim të paligjshëm, dhe inxhinierin e kompanisë së ndërtimit, për kundërshtim të punonjësve të policisë. Ndërtuesja, sipas procesverbalit të arrestimit, po vijonte ndërtimin e një objekti, në rrugën “Frederik Shiroka” në Tiranë, edhe pse për të kishte një vendim për pezullimin e punimeve dhe një masë administrative që e ndëshkonte me gjobë. Pas një kontrolli të kryer nga Inspektorati i Ndërtimit në Bashkinë e Tiranës, rezultoi se në objekt kishte disa punëtorë që vijonin kryerjen e punimeve, si dhe inxhinieri nuk i ka lejuar ata të futeshin brenda objektit. Për këtë arsye, është njoftuar policia, e cila ka kryer arrestimin e ndërtueses dhe inxhinierit. Por nga verifikimet e kryera, rezultoi se pezullimi i punimeve dhe masa administrative që ishin vendosur nga Inspektori i Mbrojtjes së Territorit në Bashkinë e Tiranës, ishin shfuqizuar nga Gjykata Administrative dhe ishin lënë në fuqi edhe nga Gjykata e Apelit. Në këto kushte, vijimi i punimeve në objekt, sipas prokurorisë, nuk është i paligjshëm, pasi gjykata është shprehur për këtë çështje në seancën për sigurimin e padisë. Edhe ky arrestim është konsideruar i paligjshëm nga prokuroria, e cila ka urdhëruar lirimin e menjëhershëm të ndërtueses dhe inxhinierit të kompanisë.
Arrestimi i ndërtuesit Reli
Të premten e javës së shkuar, rreth orës 23:00, efektivë të komisariatit nr. 1, kryen një kontroll në një kantier ndërtimi në zonën e Farkës në Tiranë. Objektet e kontrolluara, janë në pronësi të ndërtuesit Arben Reli, i cili disa kohë më parë kishte lidhur një kontratë me një tjetër kompani, e cila merrte përsipër kryerjen e punimeve. Për shkak të vonesave, dhe problemeve mes dy kompanive, përfaqësuesit e tyre kanë bërë një marrëveshje për prishjen e kontratës së parë. Duke qenë se kompania që kishte marrë përsipër punimet, kishte dërguar në objekt skela e materiale të tjera të nevojshme për punime, pas prishjes së marrëveshjes, ajo ka kërkuar rimarrjen e tyre. Mbrëmjen e së premtes, policia konstatoi katër punëtorë të kësaj kompanie, të cilët po zbrisnin nga objekti materialet, të cilat do i ngarkonin në një kamionçinë të bardhë që ishte parkuar pranë objektit. Pas intervistimit, ata i thanë policisë se ishin punëtorë të kompanisë që do kryente punimet dhe jo të kompanisë së Relit. Ata kishin shkuar për të marrë skelat dhe mjetet e tjera të punës. Por pavarësisht këtyre deklarimeve, policia kreu arrestimin e ndërtuesit Arben Reli, i cili sipas prokurorisë, nuk kishte asnjë lidhje me këtë episod. Për këtë arsye, ditën e djeshme prokuroria u shpreh me vendim se arrestimi i ndërtuesit Arben Reli, është i paligjshëm dhe urdhëroi lirimin e tij të menjëhershëm nga qelia. Avokati mbrojtës i Relit, ish-Prokurori i Përgjithshëm Theodhori Sollaku, tha se policia po vepron si një bandë gjobëvënëse.
