Flet një burim brenda takimit të sotëm të Isa Mustafës, Ramush Haradinajt, Fatmir Limajt e Albin Kurtit
Prishtinë, 14 korrik 2014 – Nënshkrimi i draftit të marrëveshjes 9 pikëshe ndërmjet liderëeve të koalicionit opozitar LDK-AAK- NISMA, dhe liderit të Vetëvendosjes ka dështuar për shkak se Vetëvendosje ka kërkuar që marrëveshjes t’i shtohet edhe një ankes.
Kështu ka thënë për Gazetën Blic një burim brenda takimit të sotëm të Isa Mustafës, Ramush Haradinajt, Fatmir Limajt e Albin Kurtit, të cilët shoqëroheshin me bashkëpunëtorët e tyre.
“Ditën e shtunë kur është arritur draft-marrëveshja prej 9 pikave është pajtuar edhe Lëvizja Vetëvendosje. Pra, ishim pajtuar që të gjithë. Mirëpo, sot përfaqësuesit e Vetëvendosjes erdhën edhe me një aneks marrëveshje, e cila e ktheu gjithë procesin në pikën zero”, ka thënë ky burim.
Sipas tij, në këtë aneks marrëveshje kushtëzohej vazhdimi i dialogut me Serbinë dhe procesi i privatizimit, dy pika për të cilat grupet punuese kishin punuar gjatë, bashkë me Vetëvendosjen.
“Tani gjithçka është kthyer në pikën zero dhe, siç po shihet, do të jetë shumë e vështirë arritja e marrëveshjes”, ka thënë burimi i Gazetës Blic.
Gazeta Blic ka publiokuar edhe draftin e marrëveshjes prej nëntë pikave, e cila ishte arritur ditën e shtunë nga Koalicioni LDK- AAK- Nisma dhe Lëvizja Vetëvndosje!
PARIMET E MARRËVESHJES POLITIKE NDËRMJET LIDHJES DEMOKRATIKE TË KOSOVËS (LDK),
ALEANCËS PËR ARDHMERINË E KOSOVËS (AAK)
NISMËS PËR KOSOVËN (NISMA)
LËVIZJES VETËVENDOSJE (LVV)
Palët nënshkruese të kësaj Marrëveshjeje mbi parimet pajtohen që:
1. Të përqendrohen me prioritet në çështjet e zhvillimit ekonomik të vendit, rritjen e punësimit dhe të mirëqenies së qytetarëve të Kosovës, reformat substancionale në arsim dhe në shëndetësi, në forcimin e shtetit ligjor dhe luftën kundër krimit të organizuar dhe korrupsionit.
2. Të ndërmirren një varg reformash institucionale, me qëllim të demokratizimit të vendit dhe rritjes së efikasitetit të institucioneve.
3. Për perpektivën evropiane të Republikës së Kosovës dhe për përmbushjen e standardeve për anëtarësim në BE dhe në NATO, si dhe për intensifikimin e dialogut me Drejtorinë e Përgjithshme të Zgjerimit të BE-së për obligimet e Republikës së Kosovës në procesin e integrimit dhe të anëtarësimit të plotë në BE.
4. Të angazhohen për një dialog kualitativ dhe parimor, të orientuar dhe të fokusuar në cështjet me interes për Kosovën, përfshirë normalizimin e marrëdhënieve me Serbinë, por edhe njohjen e pavarësisë së Kosovë nga pesë vendet e BE-së, të cilat nuk e kanë njohur deri më tani, si dhe perspektivën e pranimit të Kosovës si anëtare e Kombeve të Bashkuara.
5. Çështjet që do të dialogohen dhe korniza e dialogut do të aprovohen në Kuvendin e Republikës së Kosovës.
6. Për fillimin e dialogut të hapur demokratik me pakicën serbe në Kosovë, për integrimin e plotë të tyre, si qytetarë të barabartë të Kosovës, nëpërmjet zhvillimit ekonomik dhe shoqëror.
7. Për zbatimin e detyrimeve nga marrëveshjet ndërkombëtare, të cilat i ka marrë Kosova, përfshirë edhe marrëveshjet që dalin si rezultat i dialogut, në harmoni me mundësitë që i lejon Kushtetuta dhe në përputhje me subjektivitetin e Republikës së Kosovës.
8. Për reformimin thelbësor të qeverisjes korporative të kompanive publike qendrore dhe lokale, ndërkaq vendimet për të ardhmen e tyre do të merren nga Kuvendi i republikës së Kosovës, në përputhje me interesat e të qytetarëve të Kosovës.
9. Kjo Marrëveshje e Parimeve do të jetë pjesë e Programit qeverisës për periudhën e ardhshme katër vjeçare. (r.m.)
