Ilir Meta nuk do të hetohet për bisedat me Kastriot Ismailajn të cilat janë përgjuar nga prokuroria rreth dy vite më parë dhe tani u publikuan në media. Edhe pse nuk ka asnjë komunikim nga Prokuroria e Përgjithshme për këto përgjime, ABC News ka mësuar përmes burimeve se nuk do të ketë hetim penal për faktet e publikuara në media.
Ata sqarojnë se për këto përgjime ka një vendim asgjesimi dhe nuk mund të përdoren si prova materiale. “Janë asgjesuar përgjimet audio të këtyre bisedave mes Ismailajt e personave të tjerë”, thone burimet.
Sipas tyre, bisedat e transkiptuara nuk përbëjnë element të provës që mund të përdoren kundër të pandehurit që akuzohet për dy vepra penale.
Hetuesit thonë se nuk mund të niset hetim edhe për nxjerrje të sekretit hetimor, pasi këto prova janë të asgjesuara dhe nuk përbëjnë më prova që përdoren në një proces gjyqësor.
Nga ana tjetër, burimet thonë se Prokuroria e Tiranës ka nisur hetimet ndaj Kastriot Ismailajt në vitin 2008 për akuzën e “pastrimit të parave”, referuar kallëzimit të Drejtorisë së Pastrimit të Parave në Policinë e Shtetit.
Pas këtij kallëzimi, prokuroria ka nisur hetimet që kanë zgjatur për rreth 4 vite, duke mbledhur prova e përgjuar për rreth 18 muaj të dyshuarin Ismailaj.
Gjatë kësaj kohe, pavarësisht bisedave të shumta kompromentuese dhe transaksioneve miliona dollarësh që kompania Ismailajt bënte me vende të ndryshme, prokruoria ka vendosur të pushoj hetimin penale në tetor të 2012.
Të gjitha veprimet hetimore edhe zbardhja e përgjimeve telefonike janë bërë nga oficeri Lutfi Minxhozi që tashmë mban detyrën e Shefit të Krimeve Ekonomike në Drejtorine e Pergjithshme të Policisë së shtetit.
I kontaktuar nga ABC News për faktet e publikuara në media dhe mos referimin e çështjes për vazhdim të hetimeve, Lutfi Minxhozi nuk ka preferuar të komentojë.
Ndërkohë vendimi i pushimit të hetimit ndaj Ismailajt me urdhër të kryeprokurorit Adriatik Llalla janë rihapur në prill të 2015, kohë kur rinisen hetimet për Kastriot Ismailajn, pas skandalit me mbledhjen e borxheve të kompanisë CEZ.
