Partia Demokratike hyn sot në Kuvend duke i dhënë fund bojkotit.
Paloka: Sot të miratohet vetëm rezoluta Kreu i grupit parlamentar demokrat Edi Paloka, gjatë mbledhjes së Konferencës së Kryetarëve para nisjes së seancës parlamentare, deklaroi se u kërkua që të ndiqet një procedurë normale dhe si pikë e parë e rendit të ditës të jetë rezoluta. Duke folur për mediat në ambientet e parlamentit ai tha se, “Sot gjendemi para një rendi dite me disa projektligje të rëndësishme si borxhi që ka marrë qeveria pa marrë leje nga parlamenti, duke e bërë këtë ligj antikushtetues. Kalimi në parlament i projekt ligjeve të tilla kur jemi në një situatë të pazakontë është jo normale. Kërkuam që projektligjet të shtyhen për në seancën tjetër dhe sot të miratohet rezoluta dhe nëse ka marrëveshje që opozita nuk i kundërshton të kalohen. Por zoti Ruçi nuk e pranoi kërkesën tonë dhe kërkoi vazhdimin e rendit të ditës pa asnjë ndryshim. Shprehim keqardhje që qysh sot neglizhohet opozita. Nuk duam që mazhoranca ta ketë bërë këtë akt sa për të kaluar radhën”. Në përfundim të mbledhjes së grupit parlamentar socialist u vendos për miratimin e rezolutës, por edhe për të vijuar me rendin e ditës, gjë që hedh poshtë kërkesën e PD.
Deputetët demokratë në Kuvend Pak çaste më parë një grup deputetët demokratë hyn në Kuvend, duke i dhënë fund zyrtarisht bojkotit. Deputetja demokrate Mesila Doda pak para hyrjes në Kuvend tha se bojkoti është një mjet ekstrem për të kundërshtuar një akt, por jo për periudha të gjata, duke shtuar se, “E vetmja gjë që kemi bërë, kemi lënë vetëm njerëzit tanë. Por tashmë opozita kthehet më e fortë dhe më e vendosur”. Pas më shumë se pesë muajsh mungese në punimet e Kuvendit, opozita rikthehet sërish, pas rënies dakord mes dy palëve për miratimin e një rezolute të përbashkët. Kryedemokrati Lulzim Basha mblodhi grupin parlamentar, pak para nisjes së seancës parlamentare, ku çështja kryesore do të jetë marrëveshja PS-PD e cila pritet të votohet si rezolutë e përbashkët. Po ashtu edhe Partia Socialiste ka mbledhur grupin parlamentar, për të dhënë udhëzimet e rastit. Mazhoranca dhe opozita, vetëm rreth mesnatës së lënë pas, përfunduan negociatat mes tyre dhe shpallën se kanë arritur një marrëveshje përmes të cilës i japin fund bojkotit dhe votohet një rezolutë. Në negociata, nga PS ishte Taulant Balla, nga LSI, Petrit Vasili kurse nga PD, Genc Pollo dhe Oerd Bylykbashi. Palët nënshkruan marrëveshjen që i jep fund bojkotit parlamentar nga opozita dhe i hap rrugën plotësimit të kërkesave të tyre nga mazhoranca. Deputeti demokrat, Pollo, konfirmoi arritjen e një pakti mes palëve, “Arritëm një marrëveshje. Fjalën e fundit e kanë deputetët nesër në Kuvend”. Pikat për marrëveshjen politike mes pozitës dhe opozitës:
-Opozita të kthehet në parlament dhe për të rivendosur plotësisht funksionimin normal të punës së parlamentit dhe ti japë fund bojkotit; ndërsa shumica në pushtet nuk duhet të përdorë shumicën e saj (3/5) dhe të anashkalojë opozitën, por të kërkojnë së bashku konsensusin me opozitën, për reforma të rëndësishme, kurdo që të jetë e mundur. -Të gjitha palët duhet të kontribuojnë në dialogun politik, i cilli duhet zhvilluar kryesisht në parlament dhe të respektojnë vendimet e Gjykatës Kushtetuese. Mazhoranca dhe opozita duhet të angazhohen në rishikimin e rregullave në lidhje me funksionimin efikas të komisioneve hetimore parlamentare, bazuar në praktikat më të mira ndërkombëtare.
-Opozita dhe shumica në pushtet duhet të angazhohen që të punojnë së bashku në mënyrë konsensuale me ndihmën e Bashkimit Europian, në lidhje me çështjen e personave me precedentë penal që janë zgjedhur apo kërkojnë të zgjidhen në poste zyrtare në bazë të standardeve europiane dhe asistencën e Komisionit të Venecias. -Përfaqësuesit e grupeve të mëdha politike në Parlamentit Evropian S& D dhe PPE do të mbështesin marrëveshjen politike.
