Partia Demokratike ka denoncuar inkriminimin e administratës duke thënë se kriminalizimi i saj po njeh rekorde të reja, dhe të dhimbshme. Deputeti demokrat Alban Zeneli në një dalje nga selia blu tha se nuk është rastësi që persona me precedentë të fortë penalë, rehatohen nga qeveria e Edi Ramës, në poste delikate, si OSHEE, e cila është në krye të represionit ndaj qytetarëve të pamundur, është në krye të favorizimeve politike, duke lënë të qetë debitorë me 205 milionë lekë vetëm pse pronari është deputet i mazhorancës, kësaj strukture që është në krye të abuzimit e korrupsionit. “Florian Qafa është një emër i njohur për policinë dhe kronikën e zezë. Ai është ndaluar disa herë dhe dënuar për trafik lëndësh narkotike, pasi ka kryesuar një grup kriminal droge në zonën e Ali Demit, që shpërndante drogë edhe në shkolla. Ja ku kemi këtu vendimin e gjykatës që permend dënimet e tij, kemi një numër të madh shkrimesh që janë bërë në media për arrestimin e tij dhe për aktivitetin e tij kriminal. Me Edi Ramën, erdhi koha që ky person të shpërblehet për angazhimin e tij, dhe sot është pjesë e task-forcës së OSHEE në Tiranë. Pra në krye të aksionit të ndëshkimit të qytetarëve të pamundur, dhe favorizimit të hajdutëve të mëdhenj të energjisë që janë sot pranë qeverisë”, u shpreh ai. Sipas ligjvënësit demokrat, personi me precedent penalë, ka dhe një meritë tjerë për postin që ka marrë, duke thënë se ai është angazhuar në fushatën e fundit zgjedhore, pranë shtabit të deputetit socialist, Ditmir Bushati, që aktualisht është Ministër i Jashtëm. Ai deklaroi se Partia Demokratike do ta bëjë çdo ditë betejën me krimin dhe lidhjet e krimit me politikën, duke nënvizuar se e keqja, e mbjellë në çdo cep nga Edi Rama, do të shkulet dhe se Shqipëria nuk do të mbetet peng i aleancave kriminale.
