Partia Demokratike ftoi qytetarët që të hënën në orën 11.00, të nisin aksionin kundër çmimit më të lartë të naftës. Sekretarja për Marrëdhëniet me Publikun në PD, Grdia Duma deklaroi nga selia blu se në orën 11 drejtuesit e mjeteve në mbarë Shqipërinë do të ndalojnë e fikin makinat për pesë minuta në shenjë proteste, kundër çmimit të lartë të naftës, kundër rrjepjes e varfërimit të qytetarëve dhe pasurimit të klientelës korruptive Rama-Meta.
“Faktet janë këto. Në çdo litër naftë që blejnë, qytetarët paguajnë 1008 lekë taksa për qeverinë. Çmimi i karburantit sot tek ne është më i larti në rajon e në Europë, ndërkohë që të ardhurat janë 3 herë më të ulëta se mesatarja europiane. Megjithëse Edi Rama i di mirë këto fakte, ai vazhdon të bëjë strucin. Sepse është ai që i ka rritur taksat në mënyrë të përsëritur. Çmimi i naftës, çmimi i energjisë, taksat dhe cmimet e larta, dhuna dhe padrejtësitë qeveritare janë arsyet e krizës ekonomike, varfërisë dhe papunësisë që po përjetojnë sot mijëra shqiptarë”, u shpreh ajo.
Duma tha më tej se e hëna është vetëm hapi i parë i një një proteste mbarëkombëtare kundër çmimeve të larta të energjisë dhe naftës, kundër taksave të larta, kundër arbitraritetit e padrejtësisë. Në vijim shtoi se Partia Demokratike është në krah të qytetarëve, në krah të interesave të tyre të drejta, është në ballë të protestës së tyre të legjitime dhe se të hënën në orën 11.00 nis refuzimi masiv i taksave të larta, çmimeve të larta, varfërisë dhe mjerimit të shqiptarëve.
