Në seancën e 22 shtatorit kryeministri Isa Mustafa ishte gjuajtur me vezë nga deputetët e opozitës. Kjo kishte ndodhur gjatë raportimit të Mustafës për marrëveshjet e arritura në Bruksel me Serbinë.
Në momentin kur opozita kishte hedhur vezët, një kundër reagim kishte ardhur nga një deputet i LDK-së. Armend Zemaj kishte hedhur një gotë të qelqtë ndaj opozitës. Ai e kishte mohuar këtë gjë, por opozita madje pati bërë edhe një kallëzim penal ndaj tij.
Ky rast kishte bërë që Kuvendi t’i hiqte nga përdorimi gotat e qelqta, me frikën se e njëjta situatë mund të përsëritet dhe të lëndohet ndonjë deputet.
Por me qetësimin e raporteve pozitë-opozitë në Kuvendin e Kosovës, tashmë janë rikthyer edhe gotat.
Sot para se të nis seanca, siç shihet në fotografitë e dërguara nga gazetari i lajmi.net, në tavolinat e deputetëve po vendosen bashkë me ujin, edhe gotat e qelqit.
