Parlamenti pritet që të miratojë nesër projektligjin “Për karrierën ushtarake në Forcat e Armatosura të Republikës së Shqipërisë”. Qeveria përmes një p/ligji që ia propozon Kuvendit për miratim ka përcaktuar rregullat e karrierës për Forcat e Armatosura. Ligji ka për qëllim përcaktimin e kritereve për pranimin në Forcat e Armatosura, rendin e gradave, përparimin në gradë dhe karrierë, ndërprerjen e karrierës ushtarake, si dhe të autoriteteve përgjegjëse për zhvillimin e karrierës në Forcat e Armatosura.
Por gjithsesi, debatet më të ashpra priten që të zhvillohen për raportin e komisionit hetimor “Për hetimin e akuzave mbi implikimin e Forcave të Armatosura dhe bazave ushtarake në veprimtari të kundërligjshme – transportin e lëndëve narkotike” që do të paraqitet nga deputetja Ermonela Felaj, kryetare e komisionit.
Debate do të ketë edhe projektvendim “Për ngritjen e komisionit hetimor të Kuvendit për verifikimin e ligjshmërisë së emërimeve në detyrë në administratën shtetërore, entet publike apo shoqëritë tregëtare shtetërore”. Ndonëse mazhoranca e shtyu votimin edhe për një javë për të gjetur një konsensus me opozitën, palët nuk kanë rënë dakord. Demokratët kërkojnë në kërkesën e tyre hetimin vetëm të shkarkimeve të ndodhura nga shtatori i 2013-s e deri më tani, ndërsa socialistët kërkojnë që ta shtrijnë këtë hetim edhe gjatë dy mandateve të qeverisjes së demokratëve
Risitë e ligjit për ushtarakët:
Koha e qëndrimit në gradë
1.Koha minimale e qëndrimit në një gradë për fitimin e gradës së radhës është:
Forca Tokësore/Ajrore Forca Detare Koha në gradë
a) Ushtar I Detar I 1 vit;
b) Ushtar II Detar II 1 vit;
c) Ushtar III Detar III 1 vit;
ç) Ushtar IV Detar IV 3 vjet;
d) Nëntetar Nëntetar 3 vjet;
dh) Tetar Tetar 4 vjet;
e) Rreshter Rreshter 6 vjet;
ë) Kapter Kapter 5 vjet;
f) Nëntoger Nënlejtnant 3 vjet;
g) Toger Lejtnant 4 vjet;
gj) Kapiten Kapiten lejtnant 5 vjet;
h) Major Kapiten i rangut III 6 vjet;
i) Nënkolonel Kapiten i rangut II 5 vjet;
j) Kolonel Kapiten i rangut I 5 vjet;
k) Gjeneral brigade Kundëradmiral 3 vjet;
l) Gjeneral major Nënadmiral 3 vjet.
Në rast mospërparimi në gradë, ushtarët me gradën ushtar IV, nënoficerët me gradat nëntetar, tetar dhe oficerët me gradat nëntoger, toger, kapiten, që plotësojnë 14 vite shërbimi aktiv në Forcat e Armatosura, pavarësisht nga parashikimet e pikës 1, të nenit 14, të këtij ligji, dalin në rezervë. Koha e qëndrimit në një gradë në shërbimin aktiv llogaritet nga data e hyrjes në fuqi të urdhrit përkatës për dhënien e gradës.Koha e shërbimit në rezervë nuk llogaritet si kohë qëndrimi në gradë për gradim në shërbimin aktiv. Kriteret për gradimin e oficerëve, nënoficerëve dhe ushtarëve në rezervë përcaktohen me vendim të Këshillit të Ministrave, me propozimin e ministrit të Mbrojtjes.
Mosha maksimale e qëndrimit në shërbimin aktiv
Oficeri me gradë madhore, pavarësisht nga mosplotësimi i moshës së përcaktuar në pikën 1, të këtij neni, dhe i kritereve të përcaktuara në nenet 26 dhe 27, të këtij ligji, nxirret në rezervë apo lirim, kur plotëson njërin nga këto kritere: a) Kur pas kalimit të kohës së qëndrimit në një gradë sipas pikës 1, të nenit 13, të këtij ligji, nuk ka marrë gradën e radhës; b) Kur nuk ka kuota të lira për konkurrim për gradën e radhës, sipas tabelës së organizimit dhe pajisjeve. Oficerët, pas marrjes se gradës major dhe nënoficerët pas marrjes së gradës rreshter, nuk nënshkruajnë kontratë, por vazhdojnë shërbimin aktiv të karrierës dhe shërbejnë në shërbimin aktiv sipas përcaktimeve të pikës 1, të këtij neni.
Mosha minimale e pranimit në Forcat e Armatosura është 18 vjeç. Shtetasit, në momentin e titullimit oficer aktiv dhe ushtar/detar aktiv, nuk duhet të kenë mbushur moshën 27 vjeç. Përjashtim bëjnë vetëm shtetasit që do të titullohen oficerë dhe ushtarë/detarë aktivë, të cilët do të jenë personel mjekësor i Forcave të Armatosura dhe në momentin e titullimit nuk duhet të kenë mbushur moshën 32 vjeç.
Mosha maksimale e qëndrimit në shërbimin aktiv është:
Forca Tokësore/Ajrore Forca Detare
Mosha në shërbim aktiv
a) Ushtar I Detar I 28 vjeç;
b) Ushtar II Detar II 29 vjeç;
c) Ushtar III Detar III 30 vjeç;
ç) Ushtar IV Detar IV 33 vjeç;
d) Nëntetar Nëntetar 37 vjeç;
dh) Tetar Tetar 41vjeç;
e) Rreshter Rreshter 54 vjeç;
ë) Kapter Kapter 55 vjeç;
f) Kryekapter Kryekapter 57 vjeç;
g) Nëntoger Nënlejtnant 30 vjeç;
gj) Toger Lejtnant 34 vjeç;
h) Kapiten Kapiten lejtnant 41 vjeç;
i) Major Kapiten i rangut III 55 vjeç;
j) Nënkolonel Kapiten i rangut II 57 vjeç;
k) Kolonel Kapiten i rangut i 59 vjeç;
l) Gjeneral brigade Kundëradmiral 61 vjeç;
ll) Gjeneral major Nënadmiral 63 vjeç;
m) Gjeneral lejtnant Admiral 65 vjeç.
