Ankesën në Apel ndaj vendimit të themelores e kishte paraqitur mbrojtja e Oliver Ivanoviqit, ndërsa prokuroria ishte ankuar për lirimin e të akuzuarve tjerë të këtij procesi gjyqësor.
Aktualisht në gjykatë është duke u konstatuar prania e palëve, ndërsa mbrojtja e të akuzuarve po kërkon përjashtimin nga kolegji i Apelit të gjyqtarit Driton Muharremi.
Mbrojtja pretendon se gjyqtari Muharremi është i anshëm, ndërsa nuk u beson gjyqtarëve kosovarë.
Avokati i të akuzuarit Ilija Vujaçiq, duke arsyetuar kërkesën për përjashtim të gjyqtarit Muharremi tha se për klientin e tij trupi gjykues i EULEX-it në shkallë të parë ka qenë mjaft objektiv, ndërsa kërkoi që edhe kolegji i Apeit të jetë i përbërë vetëm nga gjyqtarë të Misionit Evropian për sundim të Ligjit.
Prokuroria dhe pala e dëmtuar nuk e kundërshtojnë përbërjen e kolegjit.
Sipas prokurorisë mbrojtja po kërkon përjashtimin gjyqtarit vetëm pse ai është shqiptar dhe kjo nuk duhet të ndodhë.
Pas kësaj kërkese të mbrojtjes gjyqtari referues i kolegjit të Apelit paralajmëroi që ky kolegj derisa të vendoset rreth kërkesës për përjashtim të gjyqtarit, do t’i ndërpresë të gjitha veprimet
Oliver Ivanoviq u dënua me nëntë vjet burg më 21 janar të këtij viti për krime lufte të kryera ndaj shqiptarëve.
Ai akuzohej ka urdhëruar vrasjen e shqiptarëve etnikë në Mitrovicë më 14 prill 1999 gjatë bombardimeve të NATO-s, kur supozohet se ishte lider i një njësie paraushtarake policore.
Ivanoviq akuzohej gjithashtu bashkë me Dragolub Delibashiqin për nxitje të vrasjes së shqiptarëve etnikë gjatë trazirave që shpërthyen pas luftës më 3 shkurt 2000, kur shumë shqiptarë u dëbuan nga shtëpitë e tyre.
Aleksandar Lazoviq dhe babë e bir Ilija dhe Nebojsa Vujaçiq ngarkoheshin me akuza për vrasje ose tentativë për vrasje.
Më 21 janar Ivanoviq ishte liruar nga akuza për nxitje në vrasje të rëndë, ndërsa të pafajshëm qenë shpallur edhe Dragolub Delibashiq, Aleksandër Llazoviq dhe Ilija e Nebojsha Vujaçiq.
