Ministria e Punëve të Jashtme (MPJ) e Kosovës e ka marrë me shqetësim lajmin për shpërthimin tragjik në Aeroportin Ndërkombëtar të Stambollit, ku kanë mbetur të vdekur 28 persona dhe rreth 60 të plagosur.
MPJ shpreh solidaritetin me Turqinë dhe popullin turk në këto momente të vështira dhe do të qëndrojë përkrah institucioneve për çfarëdo nevoje. Që nga momenti i shpërthimit, MPJ ka qenë në komunikim të vazhdueshëm me Ambasadën e Kosovës në Ankara dhe Konsullatën në Stamboll për t’u informuar në detaje nëse ka të përfshirë shtetas të Kosovës.
Deri në këto momente, asnjë qytetar i Kosovës nuk është prekur nga sulmet por organet e sigurisë ende po vazhdojnë të angazhohen për të siguruar zonën ku ka ndodhur shpërthimi dhe për t’i identifikuar viktimat, thuhet në kumtesën e MPJ-së.
Për të gjithë shtetasit e Kosovës që ndodhen në Turqi, apo familjarët e tyre, MPJ ka vënë në dispozicion një numër telefoni të Konsullit të Përgjithshëm në Stamboll, për të adresuar çfarëdo pyetje dhe nevoje.
Numri i telefonit është: +905309548870.
