Ka nisur seanca parlamentare, në të cilën pritet të vendoset fati i reformës në drejtësi. Seanca ka nisur pa një dakordësi mbi draftin që do të votohet. PD dhe LSI akuzojnë PS -në se dështoi me qëllim mbledhjen e Komisionit të Posaçëm për të përfshirë ndryshimet sipas rakordimeve me komisionerin Hahn. Kryetari i Parlamentit, Ilir Meta shprehu keqardhjen për mos arritjen e një konsensusi. Por tha se seanca nuk do të mbyllet pa u miratuar reforma. Ai tha se drafti mund të votohet edhe me 94 vota, por theksoi se konsensusi është më i rëndësishëm. “Reforma nuk na duhet për zgjedhjet e ardhshme, por për 30 vitet e ardhshme”, u shpreh ai. Seanca ka nisur me çështje të tjera. “Stabiliteti është shumë i rëndësishëm. S’duhet të ndalemi këtu kush është më pro amerikan apo anti europian. Dhe SHBA janë të interesuar për stabilitet. Unë do të lë që tani vendin këtu, do të shkoj te Basha, te ambasadori Lu që është këtu në sallë, që ne të japim mesazhin që ne e miratuam reformën me konsensus patriotik. Nuk po marrim vesh se çfarë bëhet për disa gjëra të vogla. Sepse komisioneri Hahn e shpjegoi shumë mirë”, deklaroi kryetari i Kuvendit. Në sallë gjendet edhe opozita.
