Blerim Ciroka
Sot me datë 12 Shtator 2016, në xhaminë Shqiptare këtu në Londër, e gjendur në zonën e quajtur Queen`s Park, u festua festa e Bajramit të Kurbanit. Me pjesëmarrjen e gjerë të shumë Shqiptarëve që jetojnë në Londër kjo festë solli atmosferën e munguar në përditshmërinë e mërgimtarëve në kryeqytetin britanik. Aktiviteti filloi me kryerjen e faljes dhe ligjëratën e mbajtur në gjuhën Shqipe nga imamët e xhamisë Sami Raqi dhe Bahri Boja. Tema ishte rreth domethënies së Kurbanit dhe vlerave të ndihmës ndaj njerëzve që në nevojë. Pjesëmarrja ishte mjaft e gjerë nga besimtarë të ardhur nga zona të ndryshme të qytetit. Pas faljes dhe riteve të tjera të kësaj dite bashkëatdhetarët shprehën urimet më të mira për njëri-tjetrin. Vlen të theksohet se kjo xhami është hapur që në vitin 2009, më së shumti më ndihmën e Shqiptarëve që jetojnë e punojnë në Britani. Kjo xhami më së shumti mbahet në baza vullnetare ku puna dhe shërbimi i besimtarëve të caktuar ka luajtur një rol kyç në mbarëvajtjen e këtij institucione publik fetar. Lusim Zotin që gëzimi e lumturia të ngadhnjejë në çdo familje Shqiptare.
