Raporti ka analizuar të mbledhurat nga anketa me 1300 respondentë dhe janë gjetur shifra të rëndësishme sa i përket korrupsionit dhe pasojave të tij.
Nga këto anketa ka dalë se luftimet e korrupsionit nuk janë efektive dhe se institucioni i Policisë së Kosovës mbetet burimi më i sigurt, ku qytetarët raportojnë për rastet e korrupsionit.
Petrit Skenderi, këshilltar në projektin Përkrahje Përpjekjeve Kundër Korrupsionit në Kosovë, duke raportuar për të gjeturat e anketës ka thënë se faktorët më të rëndësishëm që e shkaktojnë korrupsionin në Kosovë janë jo efektshmëritë e sistemit gjyqësor, të cilat gjithashtu janë të ndjekura nga dëshira e pasurimit të shpejtë personal nga njerëzit që janë në pozita udhëheqëse.
Sa i përket çështjes se në cilat institucione ka më shumë korrupsion, të anketuarit janë përgjigjur se korrupsioni është më i madh në partitë politike, që pasohen nga Kuvendi dhe nga institucionet tjera të nivelit qendror si: Drejtësia dhe Shëndetësia.
Këto shifra, sipas zyrtarëve që analizuan anketat janë të dhëna që korrespondojnë edhe me ato të viteve të kaluara. Kjo tregon që nuk ka përmirsim sa i përket çështjes së korrupsionit në vend.
