Edhe pse që nga nëntori i vitit 2012, është marrë vendim që të gjitha pikat e derivateve të naftës të pajisen me arka të veçanta fiskale, me qëllim të shmangies së evazionit fiskal, një gjë të tillë ende nuk e kanë bërë shumë prej kompanive të derivateve të naftës. Një pjesë e tyre vazhdojnë të operojnë pa vë në funksion fiskalizimin e veçantë, duke bërë që ato kompani të cilat tashmë janë pajisur me to, të ndihen të pabarabarta në treg. Ndërsa, zyrtarë nga Administrata Tatimore e Kosovës (ATK), pohojnë se ata do t’i shterin të gjitha mundësitë në mënyrë që t’i bindin bizneset që të fiskalizohen. Në të kundërtën ata paralajmërojnë se do të ndërmarrin masa nga gjobitja deri tek mbyllja e bizneseve, gjë të cilën nuk e kanë bërë deri më tani.
Afrim Konjufca, zyrtar në “Hib Petrol”, ka thënë për KosovaPress se ata kanë bërë fiskalizimin e veçantë dhe fakti që shumë kompani tjera operojnë pa e bërë një gjë të tillë, po i vë ata në pozitë të pabarabartë dhe po i dëmton ata, krahasuar me bizneset tjera.
Konjufca: Kjo po krijon pabarazi
“Përkundër faktit që ne i kemi zbatuar kërkesat e legjislacionit të Kosovës, për fiskalizimin qysh nga fillimi i vitit 2013. Megjithatë jemi në dijeni se një numër i bizneseve në Kosovë, që merren me tregtinë e derivateve të naftës, ende nuk janë fiskalizuar dhe kjo dihet botërisht. Të u themi të drejtën ne kemi shfaqur pakënaqësinë tonë, pranë organeve ATK lidhur me këtë çështje. Sepse nga njëra anë ne kemi bërë shpenzime të konsiderueshme për fiskalizimin, diku mbi 100 mijë euro deri tani.”, tha ai.
Konjufca më tej thekson se këto arka fiskale janë shumë të sofistikuara dhe nuk lejojnë keqpërdorime, gjë që i vë ata në një mënyrë në avantazh në aspektin e besueshmërisë ndaj administratës tatimore, konsumatorëve dhe ndaj partnereve të tyre afarist.
Megjithëse mos fiskalizimi i shumë pikave të derivateve të naftës, i vë ata në pozitë të pabarabartë, Konjufca shpreson që së shpejti të gjitha kompanitë do të fiskalizohen dhe atëherë të gjithë do të jenë të barabartë në treg.
Konjufca: Shpresojmë që së shpejti do të jemi të barabartë
“ATK kohëve të fundit ka bërë dhe një apel të fundit që fiskalizimi të përfundoi në muajin shtator, apo fundi i tetorit. Kështu që na mban shpresa që edhe të tjerët do të fiskalizohen së shpejti dhe do të jemi të barabartë”, tha ai.
Ndërsa, Nahit Sharku, zv drejtor i përgjithshëm i Departamentit të operacioneve përmbushëse në ATK, pohon se ata po bëjnë përpjekje të vazhdueshme që ta realizojë në tërësi projektin e arkave fiskale. Ai madje thotë se kanë pasur takime dhe me përfaqësues të bizneseve të cilët i kanë njoftuar dhe për uljen e çmimeve të arkave fiskale dhe se kanë marrë premtime nga ta, se do ta respektojnë ligjin dhe do të fiskalizohen.
Sharku: Ne po monitorojmë këtë projekt
“Ne do të vazhdojmë përmes inspektorëve, që të monitorojmë këtë projekt. Për qëllim të fiskalizimit ATK ka mbajtur një takim me përfaqësues të bizneseve dhe përfaqësues të odave ekonomike, ku kemi diskutuar rreth projektit të fiskalizimit, të arriturat dhe obligimet që na presin, që bashkërisht me përfaqësues të biznesit, të përfundojmë procesin e fiskalizimit. Unanimisht dhe nga ana e përfaqësuesve të biznesit, është thënë se edhe ata janë për fiskalizim dhe do të vazhdojnë të respektojnë ligjin për fiskalizim. Mirëpo mbi të gjitha, ka pasur ankesa përsëri , ato të vazhdueshme rreth çmimit. Ne i kemi njoftuar që bazuar në informatat që i kemi marrë nga Odat ekonomike, përfaqësues të biznesit dhe shoqata e operatorëve ka një ulje të çmimeve”, tha ai.
Ndërkohë edhe në shoqatën e operatorëve të licencuar për arka fiskale thonë se disa kompani të licencuara tashmë kanë bërë ulje të çmimeve. Ata theksojnë se çmimi për dy dispenserë është 3.950 euro, ndëkaq më i larti me 8 dispensere është 6. 499 përderisa në tërë Kosovën janë vetëm 8 pika të shitjes që kanë nga 8 dispensere. Sipas zyrtarëve të kompanive për fiskalizim tashmë çmimi nuk është arsye për mosfiskalizim. Ata theksojnë se Administrata Tatimore duhet të jetë më proaktive në këtë drejtim dhe të detyrojë naftarët të fiskalizohen. Sipas tyre, shumë kompani të naftës deklarojnë se problem për ata nuk është më çmimi por ata nuk e shohin të udhës të instalojnë arkat fiskale pa qenë të detyruar nga Administrata Tatimore.
Në anën tjetër, zëvëndësdrejtori i ATK-së. Nahit Sharku thekson se në rast se naftarët vazhdojnë dhe më tej, të mos pajisen me këtë fiskalizim të veçantë, atëherë ATK do të jetë e detyruar të marrë masa, nga gjobitja e cila parashihet me ligj, e deri tek mbyllja e biznesit.
Sharku: Gjoba dhe mbyllje të bizneseve për ata që nuk fiskalizohen
“Ne sigurisht se do të kemi dhe një plan të veçantë, për pjesën tjetër të zbatimit të këtij projekti. Dhe e normalisht që ne do të bëjmë dhe nga një vizitë, tek të gjithë bizneset që merren me shitjen e derivateve të naftës dhe do të konsiderojmë këtë vizitë si vërejtje të fundit. Si njoftim të tyre për obligim të tyre dhe nëse ata nuk e respektojnë kërkesën tonë edhe pas kësaj vizite të inspektorëve që do t’i bëhet, atëherë do të fillojmë në përpikëri zbatimin e ligjit. Duke filluar lëshimin e gjobave, tërheqjen e numrit fiskal, por është dhe ajo e fundit, që ne nuk e dëshirojmë dhe mbylljen e biznesit”, tha ai..
Ndryshe, të gjitha bizneset që janë në kuadër të njësisë së tatimpaguesve të mëdhenj, apo pjesa dërmuese e tyre ishin pjesë e fiskalizimit në fazën e parë, pasi që ata posedojnë nga një pajisje qoftë arkë apo printer fiskal. Mirëpo, udhëzimi 12/2009, parasheh që bizneset që merren me tregtimin e derivateve të naftës, të fusin dhe pajisje specifike, që përveç përcjelljes në aspektin financiar, mundësojnë dhe përcjelljen sasiore të derivateve të naftës. Ky është obligim ligjor, për këto biznese dhe të gjithë ata, që merren me tregtimin e derivateve të naftës, të cilët duhet t’i vendosin këto pajisje specifike.
