British Council, së bashku me Festivalin Exit sjellin projektin digjital, i cili do të mundësojë bashkëpunimin e artistëve të rajonit, për të krijuar e miksuar muzikën e Ballkanit.
Ghostpoet quhet muzikanti britanik, që British Council dhe Festivali Exit e sjellin në Shqipëri për të punuar së bashku me dymbëdhjetë muzikantë nga Ballkani, në kuadër të projektit
“Mix the City, the Balkans”. Kjo iniciativë fton botën në një platformë interaktive video-muzikore, ku kushdo, me një kompjuter apo telefon inteligjent, mund të krijojë miksin e tij muzikor me motive ballkanike dhe më pas të mund ta postojë atë menjëherë në mediat sociale.
Gjatë 4 javëve, Ghostpoet do të jetë në kërkim të artistëve të mirënjohur apo atyre me potencial, të cilët nëpërmjet muzikës së tyre do të tregojnë historinë se si e shohin Ballkanin, qytetet e tyre, njerëzit dhe kulturën.
Ky udhëtim nis sot me Tiranën dhe vijon në Banja Lluka, Beograd, Novi Sad, Prishtinë, Sarajevë dhe Shkup. Gjatë turneut, Ghostpoet do të regjistrojë 12 muzikantë lokalë, më të cilët do të xhirojë video filmike, të cilat do të tregojnë talentin, pasurinë dhe diversitetin e rajonit. Tregimet dhe filmimet prapa çdo vendndodhjeje në tetë qytetet do të ndihmojnë artistët të zbulojnë disa nga thesaret e fshehura, të cilat e bëjnë Ballkanin me të vërtetë special.
Sot, artistët Bledi Boraku dhe Ghostpoet do të punojnë duke xhiruar video-muzikë pranë ambienteve të qendrës “Tulla Center” gjatë ditës dhe pasdite pranë Parkut Rinia.
Ndërsa nesër, Ghostpoet do të ketë një bashkëpunim me muzikantin Fatos Qerimaj, për të realizuar një video muzikore pranë Akademisë së Arteve.
Pasi ky projekt të prezantohet, publiku botëror do të mundet ta përjetojë Ballkanin përmes muzikës. Duke miksuar videot dhe muzikën e 12 artistëve, të cilët nuk janë njohur më parë me njëri-tjetrin, do t’i ofrojnë çdo përdoruesi të përdorë kreativitetin për të sjellë këto tetë qytete më afër. Rezultati përfundimtar i bashkëveprimit me platformën do të jetë një miks unik në formën e një videoklipi muzikor, i cili kombinon audio miksin nga muzikantët lokalë me videot filmike nga peizazhet autentike të Ballkanit.
“Gjatë hulumtimit tim, jam magjepsur dhe impresionuar nga llojshmëria e talentit në Ballkan. Jam shumë i gëzuar për fillimin e realizimit të këtij projekti dhe eksplorimin e thelbit të artit e botëkuptimit të rajonit që do të vizitoj” –është shprehur Ghostpoet.
‘Mix the City – the Balkans’ do të jetë në dispozicion për publikun global në www.mixthecity.com nga Korriku 2016. Ndërkohë, në të njëjtën faqe interneti përdoruesit mund të eksplorojnë dhe përjetojnë programin e hedhur më parë në Tel Aviv dhe Stamboll. Projekti është i realizuar në bashkëpunim me agjencitë kreative nga Britania e Madhe Flying Object dhe Roll Studio.
