Ministria e Shëndetësisë, ka reaguar ndaj deklaratës së Partisë Demokratike së shprehur përmes Grida Dumës, duke thënë se duke u nisur nga siguria e pacientit dhe e jetës së njeriut, kur ai hyn në sallën e operacionit, kjo ministri ka vendosur të përmirësojë rrënjësisht situatën problematike kronike të teknologjisë, instrumentave dhe sterilizimit në sallat kirurgjikale dhe në kabinetet kirurgjikale.
“Është detyra jonë të sqarojmë sërish opinionin publik dhe të hedhim poshtë shpifjen e rradhës së PD-së, lidhur me transparencën e plotë që ka shoqëruar të gjithë procesin e prokurimit publik për “sigurimin e shërbimeve të integruara për ofrimin e set-it të personalizuar të instrumenteve kirurgjikalë sterilë, furnizimin me materiale mjekësore sterile njëpërdorimshe në sallat kirurgjikale, trajtimin e mbetjeve me rrezik biologjik dhe dezinfektimin e sallave kirurgjikale dhe mjediseve ku do të ofrohet ky shërbim”, thuhet në qëndrimin e MSH.
Më tej deklarohet se kjo procedurë ka qenë transparente dhe e konsultuar, që nga momenti i konceptimit të saj në dhjetor 2013, studimit vijues paraprak të vlerësimit të situatës në të gjithë spitalet e vendit, konsultimit dhe komunikimit shkresor me të gjithë drejtuesit e shërbimeve kirurgjikale në shërbimet spitalore universitare, hartimit të dokumentacionit përkatës, siç janë studimi i feasibilitetit dhe hartimi i dokumentacionit standard të tenderit, duke vijuar së fundi me publikimin në portalin online të Agjencisë së Prokurimit Publik dhe njojftimin si procedurë prokurimi publik ndërkombëtar në gazetën prestigjoze ndërkombëtare “Financial Times”, e premte, 13 shkurt 2015.
Lidhur me koston financiare të këtij programi, Ministria e Shëndetësisë bën me dije se të dhënat e vitit 2013 për QSUT-në dëshmojnë se kostot operative të shpenzimeve mesatare për instrumenta kirugjikalë, sterilizimin e tyre, dezifenktimit të sallës, lëvrimit të veshjeve, si dhe kosto të tjera të lidhura me sallat operatore kirurgjikale për një operacion, me kushtet aktuale të, janë pothuaj të barabarta me atë çka synohet të shpenzohet me këtë projekt të ri.
Sipas kësaj ministrie projekti i ri, me të njëtin nivel shpenzimesh, përmban një investim fillestar në instrumenta kirurgjikale dhe makineri e pajisje me vlerë 1.6 miliardë lekë, dhe një riinvestim po me këtë vlerë në vitin 2022, i cili në fund të zbatimit të kontratës mbetet pronë e sistemit spitalor publik.
“Atëherë, për çfarë proteston Opozita? Mos vallë po harxhohet më shumë? Jo, po mendohet të shpenzohet e njëjta sasi parash për të rritur sigurinë, cilësinë dhe shkallën e profesionalizmit të shërbimit kirurgjikal në vend. Partneritetin publik privat ne e konsiderojmë si një rrugë të shpejtë dhe efektive për të realizuar investime madhore dhe të domosdoshme në shëndetësië, menaxhim dhe administrim efikas të mjeteve dhe burimeve, duke mbetur garant të cilësisë dhe sigurisë së shërbimit shëndetësor që ofrohet në spitalet tona publike”, shton më tej MSH.
Në këtë linjë nënvizohet se projekti i ri rrit sigurinë për mbrojtjen e jetës së pacientit, rrit cilësinë e shërbimit, ul kostot e shërbimit shëndetësor që burojnë nga infeksionet spitalore, ditëqëndrim dhe përdorim barnash materialesh mjekësore.
Po ashtu thuhet se ky projekt i’u ofron kirurgëve shqiptarë mundësinë për të shprehur në maksimum aftësinë e tyre, e afron zbatimin e standardeve të BE-së për sterilizimin dhe materialet mjekësore njëpërdorimshe, rrit besimin e qytetarëve shqiptarë tek sistemi shëndetësor publik, përmirëson imazhin e shërbimit shëndetësor publik dhe të vendit tek vizitorët e huaj investitorë, apo turistë.
