Agjencia e lajmeve për Europën Juglindore, SEE, shkruan se operatori i njohur i hoteleve, Marriott International, pronar i markës Sheraton, u ka konfirmuar se nuk menaxhon më hotel Sheraton Tirana.
“Marriott po siguron një tranzicion të butë për aksionerët, klientët dhe partnerët,” tha kompania.
Lajme teNjejta
“Çfarëdo pyetje në lidhje me të ardhmen e hotelit duhet të drejtohet tek pronarët, MAK-Albania Limited”, thuhet në deklaratë.
SEE thotë se ka bërë disa telefonata tek MAK-Albania, por pa marrë përgjigje.
Agjencia raporton se ekziston mundësia që largimi i Sheraton ka ardhur për shkak të vështirësive me të cilat po përballet pronari i pronës, MAK-Albania në vitet e fundit, pas mungesës së investimeve dhe përkeqësimit të standardeve.
MAK-Albania është një degë e kompanisë nga Kuvajti, Kharafi&Sons, aktive në Shqipëri që prej vitit 1992.
Sheraton Tirana ishte hoteli i parë me pesë yje në kryeqytetin shqiptar, që prej vitit 2003.
Ndërkohë rrjeti amerikan Hilton ka thënë në fillim të javës se do hapë të parin hotel në Shqipëri në verën e këtij viti.
