nga Sara Shiku
Në memorien e një kombi mbeten të pashlyeshme shumë momente. Për brezat e rinj pa dyshim më mbresëlënësi për 1001 arsye mbetet ‘ngjarja e Beogradit’ që drithëroi me miliona zemra shqiptarësh në trojet etnike apo anë e mbanë botës. Gjithkush ka farkëtuar në memorien e tij caste, ku ngadhënjente e mira mbi të keqën, e drejta mbi padrejtësinë. Mbase cdo shqiptar do të donte të ishte aty, në Beograd, në fushën e gjelbër ku për cdo njeri normal luhej thjesht një ndeshje futbolli, por duket se humbja mbetej thjesht e papranueshme për palën tjetër. Në mbamendjen tonë, ‘ngjarja e Beogradit’ është një triumf.
Duket se ky ka qenë motivi që shtyu regjisorët Kreshnik Januzi dhe Luftar Von Rama të sjellin nëpërmjet një filmi dokumentar rrugëtimin e skuadrës tonë kombëtare në Euro 2016.
Triumf vjen më në fund në Londër, pas shfaqjes në Shtetet e Bashkuara, ndërsa këtë Tetor ka marrë pjesë në Festivalin e Filmit në Varshavë, ku është renditur si një nder pesë dokumentarët më të mirë. Do të jetë një ngjarje e rëndesisme per shqiparet e Britanise ndjekja e këtij dokumentari që sjell intervistat ekskluzive me futbollistë të kombëtares dhe të tjerë personazhe si Cana, Gashi, Shakohoxha dhe ish-trajneri DeBiasi, te cilët flasin përveç të tjerave për tensionet në fushë gjate ndeshjes Serbi-Shqipëri. Ekipi ndan momente personale të veçanta para dhe pas kualifikmit, ndërsa janë dashur tre vjet për të përgatitur filmin. Triumf nuk mbetet vetëm në kornizat e futbollit, por trajton gjithashtu dhe aspekte kulturore, politike dhe historike dhe impaktin që këto ngjarje kanë pasur në historinë e futbollit shqiptar.
Dritan Kastrati, promovues i dokumentarit në Londër, në një prononcim për The Albanian, tha se ka qenë dëshira e tij për të kontribuar në promovimin e jo thjesht një dokumentari, por një ngjarje që ka lënë mbresa tek ai. Sipas Kastratit, është menduar që pjesa e parë e këtij aktiviteti të jetë shfaqja e filmit dokumentar, ku mjeshtërisht janë kapur caste që do të risjellin në vëmendjen e shikuesve momentet më drithëruese dhe jemi të bindur që publiku do të mbesë i befasuar nga risitë e filmit. Pjesa e dytë, që presupozohet si më interesante për nje pjesë të publikut, është hapësirë që është krijuar për të bashkëbiseduar me Lorikun.
Dritan Kastrati thekson se të ardhurat nga shitja e biletave do të shkojnë në ndihmë të fondacionit Lorik Cana 5 Fondation, i themeluar në Maj 2017 me qëllim zhvillimin e programeve sportive në shkollat fillore në të gjithë territoret shqip-folëse. Kastrati shton se dokumentari synon të japë një shembull të mirë dhe frymëzues për të rinjtë shqiptarë, por edhe për t’i dhënë një mesazh të huajve. Biletat gjenden ketu.
