I riu ferizajas, profesori i muzikës, Shaban Ratkoceri, krahas punës edukative me nxënës, së fundi talentin e tij prej muzicienti e ka sprovuar edhe me botimin e librit të parë, i cili sipas njohësve të kësaj lëmije do t’iu hyjë në punë në të ardhmen shumë, nxënësve të shkollave profesionale e të përgjithshme.
Në prani të shumë dashamirëve të muzikës, ai promovoi librin me titull “Përpunime të këngëve popullore-qytetare për violinë dhe piano”, me ç’rast është thënë se ky libër i ka munguar shumë literaturës muzikore në Kosovë. Njohësit e muzikës e kanë vlerësuar lartë punën e tij, duke thënë se ky libër do të ndikoi në ruajtje e këngëve të mirëfillta popullore-qytetare, ngritjen e nivelit të interesimit tek të rinjët për këto këngë dhe praktikimin e tyre në programet dhe koncertet e ndryshme.
Profesori i muzikës, Shaqir Govori, në cilësinë edhe të recensorit, ka spikatur se ky libër do të zë një vend të veçantë në fondin e literaturës muzikore, pasiqë në këtë libër janë përmbledhur këngët më të bukura të të gjitha trevave tona.
“Libri përmban 30 përpunime të këngëve popullore dhe qytetare, të cilat autori i përpunoi me përkushtim të veçantë duke patur gjithmonë parasysh përshtatjen e vijës melodike të këngës në shoqërimin e pijanos. Disa prej këtyre këngëve mund të konsiderohen si kryevepra të muzikës popullore dhe qytetare, si për shembull kënga” Baresha”, “Këngët e vendit tim “, “Marxhelo” etj, të cilat përkujtojnë periudhën e Rilindjes tonë Kombëtare ose romantizmin e vonshëm shqiptar”, ka thënë Govori, për të shtuar se përveç kësaj, këto këngë kujtojnë edhe emrat e këngëtarëve tanë, siç janë artistet e merituara Nexhmije Pagarusha dhe Vaçe Zela.
Më tutje Govori, ka vë në dukje se ky libër u dedikohet shkollave profesionale të muzikës, nxënësve, studentëve dhe arsimtarëve të muzikës, të cilët mund ta shfrytëzojnë si doracak për programet e tyre shkollore.
Në anën tjetër edhe profesori Artan Hasani, ka thënë se autori i librit, Shaban Ratkoceri, është një ndër muzicientet më punëtor dhe produktiv.
“Katër vite sa kam qenë mësimdhënës i Shabanit, kam arritur të kuptoi shumë herët, se ai, shumë shpejtë do të bëhet një ndër muzicientet e dalluar të ardhshëm të Ferizajt. Produktivitetin e profesor Shabanit, mund ta vërejmë edhe nga pjesëmarrja e tij nëpër evenimentet e ndryshme si Ferizaj dhe jashtë tij. Në këto ngjarje, ai është prezantuar jo vetëm me vepra të përpunuara apo të orkestruara por edhe me vepra origjinale të tij. Si adhurues i këngëve popullore për tri vite ishte pjesëmarrës i Festivalit “Zambaku i Prizrenit” me këngë origjinale”, ka thënë Hasani.
Profesor Hasani, e ka përgëzuar autorin për guximin që ka marr në botimin e këtij libri në kohën kur sipas tij “edhe i padituri bënë vërejtje”, duke thënë se do të dëshironte që të gjithë ata që nuk kanë botuar asnjëherë libër të mos bëjnë vërejtje, por vetëm sugjerime.
“Unëmendoi se vërejtjet për botimin e librave muzikor në këtë kohë janë anakronike, kur në të gjitha shkollat e muzikës punojnë me librat e autorëve serbë, janë vërejtje absurde. Së pari duhet të kemi një sasi të veprave të autoreve shqiptar e pastaj të bëjmë përzgjedhjen e librit më të përshtatshëm”, ka thënë Artan Hasani.
Autori i librit, Shaban Ratkoceri, ka thënë se në radhë të parë ky libër u dedikohet shkollave muzikore por edhe të gjithë atyre që i njohin notat muzikore. Ai ka falënderuar, Drejtorinë e Kulturës të Ferizajt, që ka ndihmuar nxjerrjen në dritë të këtij libri.
”Është libri im i parë dhe përmes këtij libri kam dashur që para të gjithë dashamirëve të muzikës të sjelli këngën shqipe ashtu të pastër siç është. Këngët të cilët janë përpunuar në këtë libër janë këngë të njohura popullore qytetare dhe janë të kapshme për instrumtistet dhe nuk kërkojnë shumë kërkesa në ekzekutim”, ka thënë Ratkoceri, i cili së shpejti pritet të mbrojë edhe temën e masterit në Fakultetin e Arteve në drejtimin e aranzhmanit.
Vlen të përmendet edhe një fakt se në promovimin e këtij libri, nxënësit e profesor Shabanit, nga Shkolla e Muzikës “Cesk Zadeja”, interpretuan këngë të përzgjedhura nga ky libër.
