Besa e dhënë nënës se do ta kthente motrën e martuar larg e përcjell gjithë rrëfimin mbi legjendën e Kostandinit dhe të Doruntinës.
Premtimi ndaj nënës e kthen nga varri Kostandinin për të përmbushur obligimin e tij.
“Doruntina”, shfaqja e bazuar në legjendën shqiptare, është dhënë në New York, pjesë të së cilës kanë qenë katër aktorë shqiptarë dhe katër të tjetër amerikanë.
Skenari i shkruar nga Lirak Çelaj dhe Matt Opatrny është bazuar në romanin “Kush e solli Doruntinën” të Ismail Kadaresë, ndërsa regjinë e ka bërë Florent Mehmetit dhe Jessica Burr.
Kjo shfaqje është dhënë në Amerikë edhe në vitin 2008, ndërsa kësaj radhe është dhënë në një koncept të ri.
Shfaqja është dhënë premierë në “Interart Theatre”, pas bashkëpunimit të teatrit “Oda” me “Blessed Unrest” në New York.
Roli i Doruntinës është një nga rolet më të veçanta dhe më sfiduese që e ka luajtur aktorja Njomëza Fetiu.
“Tani që Doruntinën amerikane e luan një aktore tjetër kemi arritur të përmbledhim një personazh me karakteristikat dhe dilemat, të cilat ndoshta mund t’i ketë secili në ato rrethana”, ka thënë ajo.
Fetiu ka treguar për gazetën se për herë të parë ka luajtur një rol ku dy persona e luajnë të njëjtin personazh.
“Shfaqja që është dhënë para publikut ka mbushur sallën plot, ndërsa të gjitha biletat janë shitur”, ka thënë Njomëza Fetiu, duke treguar për emocionet pas shfaqjes që është duartrokitur e ka përlotur publikun, si amerikan ashtu edhe atë shqiptar.
“Kënaqësi e ëndërr për çdo aktore ta përjetojë një gjë të tillë”, është shprehur Fetiu, duke shtuar se bashkëpunimi me ekipin amerikan ka qenë i jashtëzakonshëm.
“Kam mësuar shumë nga i gjithë ky proces fantastik, duke filluar nga provat ndaras që i kemi bërë, leximi i tekstit, pastaj dërgimi i xhirimeve të procesit të provave të disa pjesëve më karakteristike, si dasmës së inskenuar sipas traditës sonë e deri tek takimi me aktorët, të cilët kanë qenë shumë të entuziazmuar për të luajtur në një shfaqje që është një legjendë e jona, një prej më të bukurave”, ka treguar Fetiu.
Rolin e Doruntinës në gjuhën angleze e luan Poppy Liu.
Kostandini shqiptar, Eshref Durmishi, ka thënë për “Zërin” se të dy ekipet, shqiptar dhe ai amerikan kanë punuar ndaras, ndërsa pas nëntë ditëve prova intensive së bashku në Amerikë, shfaqja ka dalë shumë mirë para publiku.
“Kur kemi dalë në premierë më është dukur si ëndërr që për nëntë ditë kemi arritur ta finalizojmë shfaqjen aq mirë”, ka thënë Durmishi, duke treguar se publiku e ka pritur shumë mirë shfaqjen.
“Me çdo kusht mundohem ta largoj Doruntinën sa më larg se kam një parandjenjë të keqe”, thotë Durmishi, derisa flet për rolin e tij, duke thënë se mban fjalën që ia ka dhënë nënës së tij, se do ta kthej Doruntinën. Ai ka treguar se shfaqja është pritur mirë dhe se kjo ka qenë emocionuese.
“Isha i emocionuar se po e tregojmë në Amerikë një storie që nuk e kanë të gjithë popujt”, ka thënë aktori.
Nga aktorët amerikanë rolin e Kostandinit e luan aktori Kevin Chu. Ai ka thënë për “Zërin” se ka qenë eksperiencë e mrekullueshme të punosh me aktorët shqiptarë.
“Ka qenë e mrekullueshme të punoj me Eshref Durmishin, i cili më ka ndihmuar që ta njoh më thellë karakterin që luaj. Pas leximit të parë të shfaqjes, ne i pamë baticat dhe zbaticat mes nesh”, ka thënë Chu, duke treguar se si personazhe janë zhvilluar gjatë procesit.
“Jemi munduar që edhe më tej t’i sqarojmë rolet që i luajmë si përkthyes të këtij karakteri masiv. Shfaqja e parë shkoi shumë mirë. Energjia e publikut u bë bashkë me energjinë e performancës”, është shprehur Kevin Chu.
Ilire Vinca-Çelaj, e cila luan rolin e nënës në shfaqjen “Doruntina”, ka thënë se për shfaqjen ka filluar një rrugëtim në qendrën e botës në New York në “Interart Theater” në një sallë të mbushur me shikues shqiptarë e amerikanë.
“Në të njëjtën natë ku shfaqen 120 shfaqje, në të njëjtën kohë rrëfimi i ngritjes së Kostandinit dhe kthimit të Doruntinës nga forca e besës që e definon kulturën dhe traditën shqiptare depërtoi si një mesazh i fuqishëm dhe u orientua nga shikuesit, të cilët pas shfaqjes na komplimentuan me fjalët më të bukura”, ka thënë Vinca-Çelaj, duke shtuar se për të bashkëpunimi me “Blessed Unrest” mbetet një vlerë e madhe.
“Është tejet e çmueshme përvoja artistike dhe artisti duhet të përjetojë këtë liri që është e domosdoshme”, është shprehur aktorja, teksa ka thënë se njohja e teknikave, gjuhës specifike të artit, këndvështrimet e pasuruan edhe legjendën shqiptare duke e ngjallur në skenë lashtësinë nën vellon e modernitetit për nga paraqitja skenike.
“Roli i nënës në këtë shfaqje është një rol i rëndësishëm për karrierën time duke qenë se është në dy gjuhët shqip e anglisht dhe për nga pesha si personazh dramatik. Është rol që çdo aktore do ta dëshironte dhe unë kam shkrirë në të gjithë përvojën time, emocionet për ta kompletuar”, thotë aktorja Ilire Vinca-Çelaj teksa flet për rolin e nënës.
Ajo ka thënë se besa e dhënë është diçka e re për amerikanët.
“Besën e shqiptarit e përjetuan si një pasuri të traditës tonë. Kjo forcë që tejkalon edhe forcën e natyrës dhe e mund edhe vdekjen”, është shprehur aktorja, e cila pjesë e kësaj shfaqje kishte qenë edhe në vitin 2008.
“Shfaqja këtë herë për dallim nga 2008-a është risjellë nga aktorë të rinj amerikanë. Unë kam pasur tjetër rol në 2008 dhe tani e kam rolin e nënës e më është dashur ta ndërtoj nga fillimi, por kjo ka qenë një freski për mua”, ka thënë Ilire Vinca-Çelaj.
Nentor Fetiu është shprehur se për të është kënaqësi e madhe dhe ndjenjë e jashtëzakonshme fakti që janë kthyer në New York me të njëjtën shfaqje pas shtatë vjetësh.
“Unë luaj dy role atë të vëllait dhe të kujdestarit apo shoqëruesit të nënës dhe të Doruntinës”, ka treguar Fetiu rreth rolit të tij, duke shtuar se të luash në Manhattan, në gjuhën shqipe dhe në atë angleze është përvojë e rrallë dhe shumë e mirë.
“I falënderoj gjithë ata që na përkrahën në këtë shfaqje dhe komunitetin shqiptar në Amerikë, të cilët na përkrahin në çdo formë”, është shprehur Nentor Fetiu. Shfaqja do të jepet në Amerikë deri më 10 maj.
