Kuvendi i Maqedonisë emëroi ministrat e rinj të Bashkimit Demokratik për Integrim. LSDM-ja votoi kundër, ndërsa deputetët e Partisë Demokratike Shqiptare nuk morën pjesë në seancën e votimit, raporton Alsat-M.
Kryeministri teknik Emil Dimitriev, gjatë fjalimit të tij para deputetëve, tha se pret që ministrat e rinj të vazhdojnë projektet e Qeverisë. Sipas tij, projektet madhore do të vazhdojnë pas zgjedhjeve, meqë bëhet fjalë për qeveri teknike.
Imer Aliu i PDSH-së theksoi se ky ishte elaborimi më i shkurtët që mbahet mend ndonjëherë për emërimin e ministrave. Ai tha se fjalimi zgjati vetëm 2 minuta e 40 sekonda, pavarësisht se bëhej fjalë për 7 ministra.
Aliu e kritikoi kryeministrin teknik se nuk e pa të udhës që ministrave të rinj tua përmendë as emrat.
“Këto institucione që udhëhiqeshin nga shqiptarët, në fakt ishin boshe, sepse asgjë nuk është bërë për shqiptarët. Ministrat që ishin aty, ishin sa për sy e faqe, sikur të mos ishte askush. Këto vende edhe më tej do të vazhdojnë të jenë bosh sepse këto djem të ri nuk do të mund të bëjnë asgjë sepse tash futemi në fushatë parazgjedhore”, tha Aliu.
Sipas deputetit të PDSH-së, problemi real i BDI-së është problemi i brendshëm. Sipas tij, “nuk mund të mbulohen 13 vite keqqeverisje me këto reforma në të cilat askush nuk beson”.
“Mos të harrojmë se e gjithë kjo katrahurë u nis kur deklaruat se BDI po del nga qeveria, kurse në fakt përfunduat duke i zëvendësuar ministrat”, tha Aliu.
Ai foli për dështimet e ish-ministrave të BDI-së, duke i përmendur secilin emër dhe mbiemër. Sipas tij, “ministrat e BDI-së kanë punuar për vete dhe jo për popullin”.
Ermira Mehmeti, deputete e BDI-së, tha se shumica e ministrave të rinj i takojnë një brezi të ri dhe se shumica prej tyre janë doktorë shkencash e magjistra dhe me orientime proevropiane.
“Ajo që ka shumë rëndësi është se këta kandidatë nuk vuajnë nga inferioriteti për të qenë bartës të funksionit . BDI gjithmonë ka promovuar oferta të reja. Ne sot po bëjmë një kontratë të re me opinionin e Maqedonisë. Sot po tregojmë se kemi guxim dhe dituri që të heqim figurat që një kohë të gjatë ishin ngjitur për pozitat e tyre”, tha Mehmeti.
Sipas Mehmetit, për ndryshimet brenda BDI-së notën përfundimtare do ta japin votuesit shqiptarë të Maqedonisë.
Deputetja e pavarur Solza Gërçeva e kritikoi vendimin e BDI-së që Ahmeti të ketë të drejtën ekskluzive të emërimit të ministrave të rinj. Sipas saj, “kjo flet shumë për demokracinë që mbretëron brenda BDI-së”.
Petre Shilegov nga LSDM-ja u shpreh se LSDM-ja nuk do të mbështesë zgjedhjen e këtyre ministrave dhe zëvendësministrave, sepse bëhet fjalë për “banda kriminale”.
“Sot për pak do të ishim dëshmitarë të një skenari. Çfarë ju detyroi ta plotësoni listën me njërin nga zëvendësit i cili me uniformën e ARM-së u përkul para përmendores së UÇK-së në Sllupçan të Kumanovës. BDI-ja ishte dëshmitar i shurdhër, por edhe bashkëpjesëmarrës në partizimin e institucioneve, ishte bashkëpjesëmarrëse e vendimeve gjyqësore që dilnin nga defteri i VMRO-DPMNE-së”, tha Shilegov.
“Kishit një vit e gjysmë kohë për t’u reformuar, ndërkohë që silleshit si diplomatë. Vendimi i BDI-së për një hap të këtillë, pak para shpërbërjes së kuvendit, është një kontribut i BDI-së për thellimin e krizës politike. Ju nuk keni shpëtim. Ju jeni kreatorët e krizës”, tha Shilegov..
Ai pyeti përse BDI-ja nuk kërkoi përgjegjësi kur u bë publik raporti i Pribes.
“Këtu nuk bëhet fjalë për zgjidhje të krizës politike, bëhet fjalë për tentim qyqar të BDI-së për të hedhur hi syve”, theksoi ai.
Fjalimi i Shilegovit nxiti reagime të ashpra nga deputetët e VMRO-së dhe BDI-së.
Aleksandar Nikollovski nga VMRO-DPMNE tha se vendi është në një krizë artificiale dhe jo në krizë të vërtetë politike, krizë të cilën, sipas tij, “e shkaktuan kriminelët përmes kërcënimeve dhe shantazheve”, duke aluduar në bombat e opozitës.
“Ne kemi bashkëpunim stabil me partnerin tonë të koalicionit. Kemi pasur gjithmonë mirëkuptim, por edhe dallime për çështje të caktuara, që është shumë normale”, tha Nikollovski.
Xhevat Ademi tha se BDI-ja ka guxim të marrë vendime autonome, të pavarura, vendime që edhe kritikuesit më të mëdhenj i befasojnë.
“Jam i privilegjuar dhe ndihem i plotësuar që ne sot para opinionit të Maqedonisë prezantojmë më të mirën që kanë shqiptarët”, u shpreh Xhevat Ademi.
Deputetja opozitare Roza Topuzova-Karevska shtroi dilemën se në rast se bëhet fjalë për kuadrot më të mira që ka BDI-ja, atëherë pse priti që t’i propozojë për ministra vetëm dy ditë para shpërbërjes së Kuvendit. Pse një hap të këtillë nuk e mori më herët?”, pyeti Topuzova-Karevska.
Sipas saj, kandidatët për ministra po keqpërdoren për motive politike.
