Gjatë punimeve të seancës parlamentare është betuar në Kuvend deputetja më e re e Partisë Socialiste, Mira Shehu, e cila zë vendin e deputetes së dorëhequr Luiza Xhuvani, e cila la mandatin pas vrasjes së katërfishtë në një lokal në kryeqytet, ku i dyshuari kryesor është djali i saj Kostandin Xhuvani. Dy ditë më parë KQZ i kaloi mandatin deputetes Shehu. Kuvendi është mbledhur në seancën parlamentare, ku një pikë e rëndësishme e axhendës është interpelanca me Kryeministrin Edi Rama, e kërkuar nga deputeti Vangjel Dule, lidhur me situatën e respektimit të të drejtave të njeriut dhe të minoriteteve si dhe politikat e qeverisë në kuadër të proceseve të integrimit. Në vijim pritet miratimi i projektvendimin për procedurën që i hap rrugë përzgjedhjes së Inspektorit të Përgjithshëm të Bankës së Shqipërisë, i cili do të zëvendësojë Elivar Golemin, e cila është e akuzuar për vjedhjen në Bankën e Shqipërisë. Rendi i ditës -Projektligji “Për disa ndryshime në ligjin nr. 10.237, datë 18.02.2010 “Për sigurinë dhe shëndetin në punë”. -Projektligji “Për mbrojtjen e cilësisë së ajrit në mjedis”. -Projektligji “Për Urdhrin e Punonjësve Socialë”. -Projektligji “Për disa ndryshime dhe shtesa në ligjin nr. 9920, datë 19.05.2008 “Për procedurat tatimore në Republikën e Shqipërisë” të ndryshuar”. -Projektligji “Për ratifikimin e marrëveshjes ndryshuese të marrëveshjes së huas nr. ALB-0028, ndërmjet Këshillit të Ministrave të Republikës së Shqipërisë dhe Bankës Islamike për Zhvillim (IDB) për pjesëmarrjen në financimin e projektit të rindërtimit të rrugëve dytësore dhe lokale”. -Projektligji “Për ratifikimin e ndryshimit nr. 3 të marëveshjes së ndihmës për objektiva zhvillimi ndërmjet Këshillit të Ministrave të Republikës së Shqipërisë dhe qeverisë së Shteteve të Bashkuara të Amerikës “Për forcimin e shtetit të së drejtës dhe qeverisjen e mirë dhe krijimin e kushteve për një rritje ekonomike me bazë të gjerë dhe të qëndrueshme”. – Projektligji “Për ratifikimin e letërmarrëveshjes ndryshuese të marrëveshjes Istisna’a dhe marrëveshjes së Agjencisë Istisna’a ndërmjet Këshillit të Ministrave të Republikës së Shqipërisë dhe Bankës Islamike për Zhvillim (IDB) për projektin e rrugës Tiranë-Elbasan”. – Projektvendim “Për procedurën paraprake për përzgjedhjen e Inspektorit të Përgjithshëm të Bankës së Shqipërisë”. – Projektvendim “Për miratimin e strukturës, organikës dhe kategorizimit të pozicioneve të punës të komisionerit për mbikëqyrjen e shërbimit civil”. -Projektvendim “Për zgjedhjen e anëtarëve të Këshillit Drejtues të Radiotelevizionit Shqiptar”. – Interpelancë me Kryeministrin kërkuar nga deputeti Vangjel Dule, lidhur me situatën e respektimit të të drejtave të njeriut dhe të minoriteteve si dhe politikat e qeverisë në kuadër të proceseve të integrimit. – Interpelancë me Ministrin e Mjedisit kërkuar nga deputeti Piro Kapurani, lidhur me “Pasqyrimin e punës gjatë këtij viti të Ministrisë së Mjedisit, në mbrojtjen dhe pasurimin e pyjeve dhe masat që duhen marrë për të riparuar shkatërrimin shumë vjeçar”.
