AKK-ja i ka kërkuar seriozisht Arifajt që të heqë dorë nga biznesi privat. Nëpërmjet shkresave, Arifaj e ka njoftuar organin për mbikëqyren e deklarimit të pasurisë se ka hequr dorë nga të qenit person i autorizuar në një biznes që është agjenci publicitare. Lidhur më këtë AKK-ja e ka publikuar një vendim ku thotë se, Arifaj i është shmangur konfliktit të interesit si zyrtar i lartë publik që është.
Ndërkaq, në deklarimin e fundit të pasurisë i cili është bërë publik para disa muajve, kryetari i Partisë së Fortë kishte deklaruar se është aksionarë me 49 për qind të aksioneve në shoqërinë komerciale “Trembelat”.
Por AKK-ja nuk është marrë me pikturën në vlerë prej 1 milion eurove, sa do që vlera e saj ishte tallja më e madhe që ndonjë zyrtar publik kishte bërë më këtë institucion. Piktura është paraqitur si pasuri e luajtshme. Dhe në fund të rubrikës së formularit të deklarimit është shënuar nga zyrtarët e AKK-së se “Vlera e pikturës së quajtur ‘Profesionet e preferuara’ është përcaktuar nga vet deklaruesi”.
