Deputetëve të Kuvendit të Shqipërisë do t’u ndalohet përdorimi i telefonisë celulare në ambientet e sallës së Parlamentit. Një kufizim i tillë është vendosur në Kodin e ri të Etikës të hartuar nga Kuvendi në bashkëpunim me OSBE-në dhe që pritet të miratohet në seancë plenare.
Në Kod (neni 10) ndër të tjera thuhet: “Gjatë zhvillimit të punimeve të Kuvendit në komisione dhe seancë plenare, deputeti duhet të paraqitet me veshje zyrtare. Gjatë zhvillimit të seancave plenare dhe mbledhjeve të organeve të Kuvendit, si rregull, deputeti nuk duhet të përdorë telefoninë e lëvizshme”
Një kapitull i veçantë I është lënë edhe sjelljes në Kuvend. Deputetëve u ndalohet të përdorin fjalë të pahijshme apo ofenduese në Kuvend, të pengojnë apo cenojnë rregullin e zhvillimit të punimeve të seancës. Paragrafi lidhur me këtë çështje vijon si më poshtë: “Deputeti nuk duhet: ç) të kërcënojë apo fyejë deputetët e tjerë, anëtarët e Këshillit të Ministrave dhe personalitetet e tjera të larta shtetëror.”
