Pas diskutimeve nga të gjithë këshilltarët bashkiak u arrit miratimi i buxhetit për Bashkin e Tiranës për vitin 2015. Këshilltarët e majtë propozuan që me këtë buxhet të bëhet edhe shlyerja e borxhit që Bashkia e Tiranës i ka Operatorit të Shpërndarjes së Energjisë Elektrike (OSSHE- së). Propozimi u bë nga këshilltari i majtë Genti Gazheli, i cili kërkoi që shlyerja e këtij borxhi të jetë si zë i veçantë në buxhet, në mënyrë që të ketë mundësi të auditohet. Sipas tij, niveli i borxhit është në vlerën 2.6 milionë dollarë, ku vetëm 1.3 milionë dollarë është borxhi principal. Përfaqësuesi i Bashkisë në Këshill, zëvendës kryetari, Enno Bozdo shtoi se ky borxh Bashkisë së Tiranës ka nisur që prej vitit 2007. Ai u shpreh i gatshëm për ta pranuar këtë propozim pasi detyrimet duhen paguar. “Në buxhet kemi parashikuar shifrën 3 milionë dollarë, që besoj se janë të mjaftueshme për të paguar borxhin e akumuluar të Bashkisë dhe detyrimet e tjera të saj”, tha Bozdo. Sipas garancisë së dhënë nga ai, ky borxh do të shlyhet pas katër këstesh. Ai shtoi se Bashkia e Tiranës është debitore, edhe ndaj Ujësjellësit më një shifër prej 1.6 milionë dollarësh. Një ndër kritikat më të lakuara mes këshilltarëve të majtë mbi buxhetin e propozuar për vitin 2015, ishte fakti që ky buxhet sipas tyre ishte po i njëjtë me atë të vitit 2013.
Bozdo: Ky projekt-buxhet mbështet vepra të mëdha publike
Në qendër përsëri të politikave dhe projekteve të Bashkisë për këtë 3-vjeçar, 2015-2017 propozohet në radhë të parë, përmirësimi i cilësisë së jetës së qytetarëve, rritja e shërbimeve, rritja dhe zhvillimi ekonomik të qytetit. “Ky projekt që paraqesim sot mbështet ndërtimin e veprave të mëdha publike për qytetin e Tiranës, me mbështetjen e donatorëve dhe partnerëve të rëndësishëm. Disa projekte të tilla janë: zgjatimi i bulevardit kryesor dhe rehabilitimi i lumit të Tiranës, terminali multi-modal i Tiranës, menaxhimi dhe trajtimi i mbetjeve për qytetin e Tiranës”, u shpreh Enno Bozdo. Në këtë projekt-buxhet për vitin 2015 të ardhurat nga taksat dhe tarifat vendore janë parashikuar që të jenë 1.6 për qind më të larta se parashikimi i vitit 2014, dhe për vitet 2016- 2017 kemi rritje përafërsisht me 1.8 për qind dhe 1.9 për qind, kundrejt viteve respektive. Infrastruktura rrugore do të përbëjë 29 për qind të buxhetit të investimeve të Bashkisë së Tiranës për periudhën 2015-2017. Po ashtu në fjalën e tij Bozdo premtoi edhe 9 kënde sportive, 3 çerdhe, 5 kopshte, 3 sholla 9-vjeçare, 2 shkolla të mesme, si edhe rikonstruksione në shumë institucione arsimore dhe investime në laboratorë.
Adriana Berberi: Buxheti i parealizueshëm, copy-paste i buxhetit të 2013-ës
Anëtarja e këshillit të ekonomisë në Këshillin Bashkiak, këshilltarja e majtë Adriana Berberi e quajti këtë projektbuxhet projeksion të gënjeshtërt. “Vazhdon që të jetë pjesë e konceptimet që të gënjejmë se do të ikin edhe këto muaj, por ndërkohë ne jemi këtu që të parashikojmë ato të ardhura të realizueshme, që nuk janë vetëm për hapjen e gropave të Tiranës, por për një buxhet që të realizojë objektivat. Ky buxhet ne na konfirmon dështimin dhe mungesën e transparencës, por edhe një paaftësi, që sot pas 2-3 vjetësh ne kemi këtë situatë, që për hir të së vërtetës është paraqitur aq keq, copy-paste”, u shpreh ajo. Fakti që ne nuk mund të hapim objekte që në tri vjet nuk realizojmë dot realizimin e tyre 100 për qind, ashtu siç është edhe grupi i objekteve të tjera deri në vitin 2017, kopshte shkolla, pavarësisht vlerës dhe destinacionit, që duhet që të sigurojë sa më shpejtë buxhet për shkollën dhe kopshte. Mbledhja e Këshillit u shoqërua me debate të ashpra ndërmjet kreut socialist të këtij Këshilli, Aldrin Dalipit dhe këshilltarit të djathtë Besnik Aliaj, konflikte të cilat kaluan edhe në akuza personale. Pas këtij debati Besnik Alilaj u largua nga mbledhja dhe Aldrin Dalipi kërkoi 5 minuta pushim.
Kritika për koshat e plehrave, edhe për qentë që enden rrugëve
Gjatë mbledhjes së Këshillit Bashkiak, këshilltarët e mazhorancës i propozuan përfaqësuesit të Bashkisë, Enno Bozdos të ndërhyjë edhe të parashikojë në buxhet problematika nga njësitë që ata përfaqësojnë. Këshilltari i majtë, Endrit Braimllari kërkoi sqarime mbi Kartën e studentit, e cila edhe pse është premtuar para 3 vjetësh nuk është arritur. Po ashtu ai kërkoi të ndërhyjë në kolektorin në rrugën e “Kokonozëve”. Kjo rrugë është rikonstruktuar vitin e parë nga Bashkia e Tiranës, mirëpo sërish në raste shirash edhe përmbytet, për shkak të bllokimit të kolektorit, i cili vite më parë është ndërtuar në mënyrë vullnetare nga banorët. Bozdo premtoi se ky investim do të kryhej brenda 2015-ës. Po ashtu, Endrit Braimllari kërkoi mbajtjen e premtimit për mbështetjen e të rinjve në biznes. Bozdo premtoi se Bashkia e Tiranës do të krijojë fondin e garancisë për 100 biznese, në një bankë të nivelit të dytë ku këta të rinj mund të marrin kredi. Shqetësime u ngritën nga këshilltarët edhe për tregun në njësinë bashkiake nr. 3, në të cilin kushtet higjieno-sanitare nuk përmbushen. Ndërsa Genti Gazheli propozoi që në projekt-buxhetin e vitit 2015 të futej edhe rikonstruksioni i rrugës “Llambi Bonata”, pasi infrastruktura e saj është problematike, edhe është shqetësim i madh për banorët e njësisë bashkiake nr. 6.
Propozimi i bërë u pranua menjëherë nga Enno Bozdo, edhe u përfshi në projektbuxhet. Ndërsa këshilltari Kristaq Blushi, bëri apel që Bashkia e Tiranës t’u përkushtohet më shumë qytetarëve. “E kam të vështirë të përmend se çfarë ka bërë kjo Bashki në këta 3 vjet”, u shpreh ai. Ai dhe këshilltari tjetër i majtë, Mehmet Hasalami ngritën në Këshill problemin e pastrimit. Sipas tyre, Tirana edhe në qendër të saj, edhe në mes të ish-Bllokut është shumë e ndotur. Ata bënë apel edhe për qentë endacakë që Bashkia duhet të ndërhyjë për të shmangur një tragjedi, si ajo e Kosovës ku humbi jetën një fëmijë. Ata kritikuan paaftësinë e Bashkisë për të dekoruar qytetin, duke përdorur katër vitet e fundit të njëjtin dekorim. Bozdo u mbrojt me argumentin se kjo teknikë ndodh edhe në qytetet e tjera evropiane. Megjithatë pas këmbënguljes së mazhorancës, Bozdo pranoi se vetëm këtë vit Bashkia ka harxhuar 150 milionë lekë të reja për dekorimin e festave të fundvitit. Kritika u hodhën edhe për mënyrën që ka zgjedhur Bashkia e Tiranës për ta shnëdrruar pedonalen në qendër të qytetit. Ata e quajtën turp shndërrimin e saj në një vend të pisët, edhe më të rrëmujshëm se pazaret e vjetra që ishin dikur në Tiranë.
