Ministri për Kthim dhe Komunitete në Qeverinë e Republikës së Kosovës, Aleksandar Jabllanoviç në një intervistë për gazetën beogradase “Vecernje Novosti” ka deklaruar se “protestat po bëhen për të rrëzuar Qeverinë dhe jo për shkarkimin tim”.
Jabllanoviç ka thënë se “Kurti do të rrëzojë pushtetin, jo mua. Kërkesa për shkarkimin tim është vetëm arsye që të rrëzohet Qeveria e Kosovës, sepse është e dukshme që opozita shqiptare nuk ka mundësi të vije në pushtet me metodat demokratike. Kurse, për dorëheqje as që po mendoj”.
Ministri ka shprehur bindjen e tij se Qeveria do të arrijë ta kapërcejë këtë krizë. Ai ka thënë se “Lista Srpska” nuk ka pasur për qëllim në asnjë moment për të nxitur destabilizim, por ka pasur për qëllim që të krijohet siguria më e mirë dhe stabiliteti për gjithë qytetarët kosovarë. Ndërsa për sa i përket çështjes së “Trepçës ai Jabllanoviç është shprehur se është tepër komplekse.
