Kosovari është lideri i grupit islamist “Phofeten Ummah” që nga muaji dhjetor i vitit të kaluar, duke zëvendësuar ish-udhëheqësin e këtij grupi, Ubaydullah Hussain, i cili është arrestuar nën akuzat për rekrutim të terroristëve për luftën në Siri.
TV2.no ka mësuar se policia norvegjeze e ka pasur prej kohësh në vëzhgim 28-vjeçarin kosovar, mirëpo të premten i ka dërguar atij një njoftim zyrtar për dëbim nga vendi. Policia e Norvegjisë pretendon se kosovari “konsiderohet kërcënim bazik për shoqërinë”.
Shalnuni, në anën tjetër, është duke e kundërshtuar dëbimin nga vendi. Ai në një prononcim për TV2.no, ka folur për akuzat ndaj ish-liderit të grupit që ai momentalisht po e udhëheq dhe akuzat për dëbim nga Norvegjia.
Adnan Shaluni (majtas) pozon para Pallatit Mbretëror të Norvegjisë me Ubaydullah Hussain.
“Çështja e Ubaydullah nuk na shqetëson neve. Mesazhi im personal është se unë nuk pranoj dëbimin, nëse keni diçka më shumë drejtohuni tek avokati im”, ka thënë kosovari i njohur si “Abu Arijon”.
Ndërkaq, avokati i tij John Christian Elden ka thënë se klienti i tij refuzon të largohet nga vendi, për shkak se nuk ka bërë asnjë shkelje ligjore.
