Për herë të parë ka performuar në shtetin prej nga e ka prejardhjen. Por ndryshe nga kjo, Volkan Hursever, shpesh viziton Kosovën dhe qytetin e Mitrovicës, ku ka lindur babai i tij dhe ku ende është shtëpia. Katër instrumente, contra cass, piano, daullet dhe saksofoni, kanë bërë bashkë artistët Volkan Hursever, Sabri Tulug Tirpan, Ediz Hafizoglu dhe Engin Recepogullari, të cilët kanë interpretuar kompozime të tyre dhe xhazin standard. Në koncertin ku ishte mbledhur publiku në numër të madh, Volkan Hursever ka interpretuar dhe një këngë që ia ka kushtuar nënës së tij, e cila kishte vdekur pas një sëmundjeje të rëndë.
Kjo nuk është e vetmja vizitë që ai i bën Kosovës si profesionist i muzikës xhaz. Në fund të muajit maj ai sërish do të vijë në Kosovë, me ç’rast do të vizitojë Fakultetin e Arteve, ku mësohet për muzikën xhaz.
Ai thotë nuk ka ndonjë arsye të veçantë pse është fokusuar më shumë te muzika xhaz, dhe tregon se edhe babai i tij ka luajtur në të njëjtin lloj të muzikës.
“Kam ardhur në vendlindjen time dhe është shumë e rëndësishme për arsye se para 80 viteve babai im ka lindur këtu”, ka thënë Hursever, i cili në Sallën e Kuqe të Pallatit të Rinisë ka performuar bashkë me Sabri Tulug Tirpan, Ediz Hafizoglu dhe Engin Recepogullari, në mbrëmjen e së enjtes.
“Ka një rëndësi të madhe për mua që jam sonte këtu dhe ndjehem jashtëzakonisht mirë”, ka thënë Volkan Hursever, i cili ka treguar se në këtë koncert të mbajtur në kuadër të “Turkish Jazz Week”, kanë interpretuar xhaz standard dhe kompozime të tyre.
“Kam qenë disa herë në Kosovë, por është hera e parë që vij në Kosovë për një koncert të tillë”, ka thënë artisti për “Zërin”, derisa ka treguar se me muzikantët e tjetër është hera e parë që të gjithë bashkë kanë interpretuar në një koncert.
“Kemi pasur projekte të ndryshme me secilin prej anëtarëve të grupit, por është hera e parë që jemi mbledhur të katërtit për një festival të tillë arsye se i kemi projektet e reja edhe janë duke e incizuar një album të ri”, është shprehur Volkan Hursever, ndërsa duke iu referuar Kosovës, ai ka thënë se për të ka rëndësi të madhe vendlindja e tij. “Enkas për festivalin jemi mbledhur të gjithë së bashku me anëtarët për “Javën e Muzikës Xhaz”. Kemi luajtur projektet tona në programin e sotëm po ashtu kemi luajtur edhe xhazin standard”, ka thënë artisti i muzikës xhaz. Në mesin e koncertit, artistëve nga Turqia u është bashkuar edhe Armend Xhaferi, si i ftuari i tyre.
“Një pjesë e koncertit është mbajtur edhe për nënën time, i është dedikuar edhe asaj. Nëna ime ka vdekur prandaj i kam kushtuar një këngë”, ka thënë Volkan Hursever, derisa ka treguar se edhe nga e njëjta sëmundje ka vdekur edhe nëna e një tjetër anëtari të grupit. “E kemi parë të arsyeshme që t’ua kushtojmë edhe atyre një këngë”, thotë Hursever, për të shtuar se janë të papërshkruara ndjenjat e tij në kohën kur e interpreton këngën kushtuar nënës. “Nuk mund t’i përshkruaj ndjenjat derisa e luaj këtë këngë.
Sepse ndjehem mirë dhe keq në të njëjtën kohë”, ka treguar artisti. Ndonëse nuk mund të flasë për emocionet që ia dhuron kjo këngë derisa e interpreton, ai thotë se ndjehet shumë mirë në mesin e kosovarëve. Po kaq mirë Volkan Hursever ka thënë se është ndjerë në qytetin e Mitrovicës dhe shtëpinë ku ka lindur babai i tij. “Ka qenë një ndjenjë interesante nuk e kam vizituar shtëpinë ku para 80 viteve ka lindur babai im”, ka treguar Hursever, derisa ka thënë se babai i tij, i cili në moshën 25-vjeçare ka emigruar në Turqi, e viziton çdo vit Mitrovicën, qytetin ku ka lindur dhe shtëpia e tij.
“Për mua kjo është shumë e rëndësishme, që të njoh vendin ku ka lindur babai im”, ka thënë për gazetën Volkan Hursever, derisa ka treguar se është i informuar për situatën politike të Mitrovicës.
“Besoj që situata e Mitrovicës nuk është një situatë që do të mundë të zgjidhet për një kohë të shkurtër, ndoshta do të marrë pak kohë që të zgjidhet, por besoj që gjithçka do të bëhet mirë dhe situata do të përmirësohet”, ka treguar për gazetën Hursever, derisa ka thënë se është i interesuar për muzikën shqiptare.
“Me këtë vizitën nuk kam shumë kohë që të takohem me muzikantë nga Kosova, por në fund të muajit maj do të vij prapë në Kosovë dhe koordinatori i festivalit do të më ndihmojë që të vizitoj Universitetin e Prishtinës, degën e muzikës për arsye se kam informata që ekziston lënda e xhazit dhe do ta vizitoj Universitetin e Prishtinës”, ka thënë Volkan Hursever, i cili ka përfunduar studimet për muzikë klasike. “Nuk ka ndonjë arsye shumë të veçantë që më ka tërhequr që të merrem me muzikën xhaz, por ndoshta është edhe prindi që më ka nxitur pak, pasi babai im është marrë me muzikën xhaz”, ka thënë Hursever, i cili ka kryer studimet master dhe doktoratën për muzikën turke. “Ndoshta e kam bërë pak me vonesë, por mendoj se gjithçka ia vlejti dhe tani jam gati për muzikën turke”, ka thënë Hursever, derisa ka shtuar se organizime të tilla si “Turkish Jazz Week” janë shumë të rëndësishme. Ai ka thënë se kur flitet për muzikën xhaz ka pika të përbashkëta jo vetëm me shqiptarët, por edhe ndërkombëtarisht. Volkan Hursever është shprehur se është një iniciativë e bukur “Turkish Jazz Week” dhe një mundësi e mirë e bashkëpunimit.
Volkan Hursever njihet për bashkëpunimet e tij, brenda dhe jashtë Turqisë, për performancat e tij në shumë festivale dhe koncerte.
