Hetim lidhjeve familjare dhe klienteliste mes anëtarëve të Këshillit të Lartë të Drejtësisë. Ka qënë ky mesazhi i përcjellë nga anëtarët e Komisionit Hetimor për KLD, në mbledhjen e djeshme. Në hapje të mbledhjes, pas miratimit të planit të hetimit, deputeti socialist, Armando Subashi, deklaroi se KLD, Shkolla e Magjistraturës, ILDKP dhe Ministria e Drejtësisë, kanë dorëzuar dokumentacionin e kërkuar në mbledhjen e parë të komisionit hetimor. Kreu i këtij komisioni, Armando Subashi, pohoi se dokumentacionet e dorëzuara nga institucionet e sipërpërmendura do të vërehen me imtësi për të parë nëse qëndrojnë 10 shkeljet e konstatuara nga 39 deputetët e mazhorancës. “Kalendari i veprimeve hetimore brenda datës 7, datë në të cilën do të zhvillohet dhe mbledhja e radhës, do të verifikojë nëse dokumentat e sjellë janë të plotë apo jo. Dokumentat do shqyrtohen për të parë nëse qëndrojnë shkeljet e konstatuara nga grupi i deputetëve”, deklaroi Subashi, teksa njoftoi se komisioni hetimor në punën e tij, do asistohet nga këshilltarë ligjorë. Deputeti socialist, tha se në një prej mbledhjeve të këtij komisioni, do të thirren edhe 2 këshilltarët. Braho apel opozitës: Mos e lini në baltë Çefën Deputeti i Lëvizjes Socialiste për Integrim, Spartak Braho, i ka bërë apel opozitës që të marrë pjesë në Komisionin Hetimor. Kryesisht kreu i komisionit për Sigurinë Kombëtare, i ka bërë thirrje Eduard Halimit dhe Arben Ristanit që të mos lënë në baltë nënkryetarin e KLD, Elvis Çefa. Më tej ai shtoi se, nuk duhet të bëjë çudi për askënd që Çefa është emëruar si nënkryetar i KLD për t’i shërbyer organeve të tjera. “Nuk është çudi që Çefa është emëruar që t’i shërbejë organeve të tjera. Duke marrë shkas edhe nga deklarata e z.Halimi, që opozita do të jetë pjesë e tryezës për reformën në drejtësi, dua t’i bëj thirrje që të jenë pjesë edhe e komisionit. Z.Halimi dhe z.Ristani duhet të vinë këtu dhe të mos e lënë në baltë Çefën”, pohoi Braho. Të njëjtën kërkesë parashtroi edhe kryetari i komisionit Subashi i cili tha se opozita duhet të gjejë forcën për të ardhur në komision. “I bëj thirrje opozitës që të gjejë forcën dhe të vijë në komision”, tha Subashi. Kërkesa e komisionit ndaj Prokurorisë Kreu i Komisionit Hetimor, Armando Subashi, tha se komisioni do i nisë një shkresë zyrtare Prokurorisë ku do i kërkohet informacion nëse ndaj z. Çefa ka filluar një ndjekje penale. “Do të përfshijmë në planin e komisionit një kërkesë zyrtare që duhet t’i dërgojmë Prokurorisë për të marrë informacion nëse ndaj z. Çefa ka filluar një çështje penale”, deklaroi Subashi. Në mbledhjen e tij të parë konstituuese më 26 shtator, komisioni, ku nuk merr pjesë opozita, prezantoi një plan paraprak hetimi, ku përfshihej grumbullimi i të dhënave nga KLD, përmes procesverbaleve të mbledhjeve dhe vendimeve të marra nga ky Këshill, që nga periudha kur kanë filluar të ushtrojnë detyrën anëtarët Çefa dhe Lelçaj. Puna hetimore e komisionit gjithashtu, do të shtrihet dhe në emërimet nga KLD-ja të gjyqtarëve në gjykatat administrative, mosemërimi i 28 kryetarë gjykatash në kundërshtim me ligjin, etj. Në këtë mbledhje, me propozim të deputetit të LSI-së, Spartak Braho, komisioni vendosi që pjesë e planit të hetimit të bëhen dhe lidhjet familjare të anëtarëve të KLD-së dhe pasuria e anëtarëve Elvis Çefa dhe Lulzim Lelçaj. Në përmbushje të objektit të hetimit komisioni do të kërkojë dhe korrespondencën mes KLD-së dhe ministrisë së Drejtësisë. Komisioni hetimor për shkarkimin e dy anëtarëve të KLD-së, Elvis Çefa dhe Lulzim Lelçaj u ngrit një javë më parë nga Kuvendi, me kërkesë të maxhorancës, pas akuzave ndaj tyre për shkelje të rënda të ligjit gjatë ushtrimit te detyrës në këtë institucion të rëndësishëm.
