Xhoana Hila dhe Erando Qatipi janë përballur në sallën e gjyqit, në Shkodër duke akuzuar njëri tjetrin për vrasjen e 82-vjeçares Angje Hila, gjyshja e vajzës së pandehur. Në sallë ndodheshin familjarë të të dy të pandehurve që u arrestuan pas ngjarjes së rëndë që ndodhi shkurtin e vitit të kaluar.
Xhoana Hila pranoi para trupit gjykues se kishte hyrë në banesën e gjyshes së saj me qëllimin për ta grabitur dhe jo për ta vrarë. “Krimin e bëri Erando, i cili e mbyti gjyshen me jastëk. Unë isha në dhomën tjetër dhe e gjeta gjyshen të vdekur”, tha 32-vjeçarja.
Menjëherë reagoi ish-i dashuri i saj, Erando Qatipi, i cili tha se nuk ndodhej fare në banesën e së moshuarës dhe se krimin e ka kryer Xhoana. “Nuk është ashtu siç pretendon prokuroria, çdo gjë që thuhet është e pavërtetë. Kërkoj gjykimin e drejtë të çështjes”, tha 27-vjeçari.
Pas këtyre deklaratave, gjyqtarja Luveda Dardha vendosi shtyrjen e seancës për shkak të kompleksitetit që paraqet çështja.
82-vjeçarja u ekzekutua nga çifti i të rinjve në banesën e saj. Ajo u mbyt me jastëk dhe më pas Qatipi dhe Hila i kanë marrë asaj disa bizhuteri floriri, dy unaza, një orë floriri dhe një shumë të hollash (lekë). Në gjykatë vajza ka deklaruar se vrasja u krye nga Erando Qatipi pasi ishte nën efektin e alkoolit.
Sipas Prokurorisë së Shkodrës, Xhoana është rritur nga gjyshja dhe ka jetuar me të, deri në ditët kur ka ndodhur krimi.
Mësohet se 32-vjeçarja ka qenë e martuar, por pas divorcit, është rikthyer të jetojë me gjyshen në banesën e saj dhe prej rreth një viti aty kishte shkuar edhe Erando Qatipi, i dashuri i saj.
Vdekja e 82-vjeçares është zbuluar nga djali i saj emigrant në Itali, Tonin Hila, pasi e ëma nuk i përgjigjej në telefon.
Dyshimi se është vrasje dhe shkuarja tek emri i mbesës ka ardhur pasi kjo e fundit sëbashku me të dashurin ishin zhvendosur po atë ditë për në Tiranë, ndërkohë që në banesën e të moshuarës, kishte shenja grabitje.
