Ministrja e Zhvillimit Urban dhe Turizmit, Eglantina Gjermeni nënshkroi të enjten Memorandumin e Mirëkuptimit për zbatimin e projektit për “Rigjallërimin e Pazarit të Krujës”, së bashku me Ministren e Kulturës, Mirela Kumbaro, Fondin Shqiptaro-Amerikan të Zhvillimit (AADF), Bashkinë e Krujës dhe komunitetin e biznesit artizanal në Pazarin e Krujës.
Projekti me një fond prej 800.000 dollarësh do të zbatohet në harkun kohor të 24 muajve. Përmes këtij projekti do të rehabilitohet kalldrëmi tek pazari i vjetër, do të rinovohen catitë dhe fasadat e dyqaneve, do të certifikohen produktet artizanale, si dhe do të mbështeten bizneset në Pazar për të përmirësuar modelin e tyre të biznesit.
Ministrja e Zhvillimit Urban dhe Turizmit, Eglantina Gjermeni theksoi se “projekti u bë i mundur si rezultat i një binomi që garanton sukses, partneriteti publik-privat. Për mua si vajzë e Krujës, këtij qyteti i cili mbart dhe ruan me dashuri një copëz të rëndësishme të memories sonë kombëtare, historike dhe kulturore, realizimi i këtij projekti do të përkthehet në terma ekonomikë me rritje të numrit të bizneseve të reja, ku përparësi do të kenë gratë dhe të rinjtë, fuqizimin e bizneseve ekzistuese, zhvillimin e produkteve artizanale dhe rritje të shitjeve pra, rritje të ekonomisë së zonës”- u shpreh Ministrja Gjermeni.
Ministrja e Kulturës Mirela Kumbaro tha se “e konsiderojmë trashëgiminë kulturore si një pasuri kombëtare, që jo vetëm duhet të promovohet për tu ndjerë krenarë por edhe për të gjeneruar të ardhura për ekonominë”. Martin Mata, shefi ekzekutiv i AADF u shpreh: “Ne do ti japim Krujës një model të suksesshëm si dhe një mbështjetje të fuqishme në zhvillimin e biznese artizanale të kësaj zonë, si pjesë e rëndësishme e trashëgimisë sonë kulturore”. Përmes këtij projekti krijohet një model i menaxhimit të zonave turistike, me potencialin për tu përshtatur më pas edhe në qytete të tjera që kanë potenciale të ngjashme në zhvillimin e turizmit.