Sipas “Urdhërit të Gazetarëve Sirianë”, i themeluar nga operatorët e informacionit që nuk janë aleatë të regjimit të Damaskut, që nga viti 2011 deri sot janë vrarë 244 gazetarë dhe fotoreporterë, sirianë dhe arabë. Vetëm qershorin e kaluar u vranë katër gazetarë, tre sirianë dhe një egjiptian
Nuk u kanë prerë kokat, por i kanë vrarë me armë zjarri duke i qëlluar në kokë, i kanë torturuar për vdekje, i kanë marrë peng dhe nuk i kanë kthyer kurrë në shtëpitë e tyre. Janë qindra gazetarë dhe fotografë arabë, numri më i madh i të cilëve sirianë, të vrarë në ndërkohë të dhunës së skajshme në Siri dhe shpesh të harruar nga mediat e mëdha, që janë më të vëmendshme për të treguar historitë e gazetarëve perëndimorë të vdekur në vendin e martirizuar të Lindjes së Mesme.
Sipas “Urdhërit të Gazetarëve Sirianë”, i themeluar nga operatorët e informacionit që nuk janë aleatë të regjimit të Damaskut, që nga viti 2011 deri sot janë vrarë 244 gazetarë dhe fotoreporterë, sirianë dhe arabë. Vetëm qershorin e kaluar u vranë katër gazetarë, tre sirianë dhe një egjiptian.
Organizata ”Reporterë pa Kufij” numëron dhjetëra gazetarë lokalë të vrarë që nga fillimi i këtij viti. Regjimi sirian dhe xhihadistët e Shtetit Islamik janë akuzuar si urdhëruesit dhe ekzekutuesit kryesorë të këtyre krimeve.
Një nga viktimat, 21-vjeçari Mutazbillah Ibrahim, punonte në Raqqa, në veri, si gazetar, për grupin editorialist ”Shaam”, kur anëtarë të Shtetit Islamik e rrëmbyen, e torturuan për dy muaj dhe më pas e vranë më 4 maj. Kufoma e tij iu dorëzua familjes pas tri ditësh.
Ahmad Hasan Ahmad, ishte 29 vjeç dhe punonte si fotograf për agjencinë shtetërore kineze të lajmeve, Hsinhua. Vdiq në Damask në rrethana që nuk u morën vesh kurrë. Ahmadin e kishin qëlluar në kokë, më 4 qershor 2014.
Kolegu i tij egjiptian, Nuri Abdellatif, kishte shkuar në Damask për të ndjekur festimet për rizgjedhjen e presidentit Bashar al Assad. Edhe ai u godit në kokë nga një predhë mortaje të qëlluar nga milicët.
Më 27 qershor u qëllua në Dara, në jug të Sirisë, Muhammad Taani, reporter i agjencisë lokale të lajmeve, Smart. Vdiq pas gjashtë ditësh në koma, në një spital jordanez.
Xhihadistët e Shtetit Islamik vranë në fillim të qershorit të kaluar Bassam Rayyes, 27 vjeç, i cili punonte si gazetar në një zonë përreth Damaskut. Trupi i tij, me shenja torturash si edhe me një vrimë në gjoks nga një armë zjarri, u gjet në fund të muajit në një banesë në periferi të kryeqytetit, ku ishin vendosur xhihadistët, para se të tërhiqeshin nga presioni i banorëve lokalë.
Ndërkohë, nga torturat në një burg të regjimit, vdiq 33-vjeçari Muhammad al Khatib. Ishte arrestuar më 8 janar 2012 në Damask, pasi kishte takuar anëtarë të një komisioni hetimor të Lidhjes Arabe, i cili kishte mbërritur në Siri gjatë kësaj periudhe. I torturuar për një kohë të gjatë në burgun e Saydnayas, pranë kryeqytetit, Khatib vdiq më 18 qershor 2014. Trupi i tij nuk iu dorëzua kurrë të afërmve, të cilët morën nga autoritetet siriane vetëm kartën e identitetit të gazetarit të ri.
