Historia e dhimbshme e një të dhunuare që dergjet e sëmurë dhe pa përkrahje nga shteti. Njihuni me Zhaneta Peton nga Semani që jeton me sëmundjen e rëndë.
Zhaneta Peto nëna e dy fëmijëve, e divorcuar dhe një nga viktimat e dhunës në familje, ndodhet në gjendje të rënduar shëndetësore. Ajo apelon për ndihmë. Zhaneta jeton në një shtëpi ë rrënuar në fshatin Seman, Fier. Ka kërkuar ndihmë nga ana e pushtetit vendor. Që prej vitit 2012, pas divorcit, ka marrë me vendim gjykate për mirërritje për dy fëmijët e vet. Por edhe pse bashkëshorti detyrohej me vendim gjykate që të paguante për rritjen e fëmijëve, sipas Zhanetës, ai nuk ka paguar asnjëherë. Por, sipas saj, as zyra përmbarimore Fier nuk ka arritur të batojë vendimin për këtë ekzekutim, pasi ish-bashkëshorti jeton në shtetin fqinj, Greqi. Ajo vuan nga sëmundja e rruazave të kuqe të gjakut. Ndërsa nuk ka asnjë të ardhur për të përballuar situatën e rëndë ekonomike dhe sëmundjen. Gruaja dergjet e sëmurë në shtratin e një prej dhomave të shtëpisë së të atit, në fshatin Seman. Nuk kanë heshtur, sipas të sëmurës, letrat dhe kërkesat e saj dërguar përfaqësueseve të pushtetit të të gjitha niveleve. Me duart që i dridhen tregon dokumentet e sëmundjes, letrat e dërguar ministrisë së Drejtësisë, asaj të Shëndetësisë, Presidentit të Republikës deri edhe Ambasadorit të SHBA në Tiranë, Donald Lu. Sipas saj, ka kërkuar mbështetje për ë jetuar ajo vetë dhe fëmijët e saj, por ka gjetur heshtje.
Rrëfimi i Zhanetës
Askush nuk e vë ujin në zjarr për mua jam e sëmurë dhe nuk e di se çfarë do ë bëhet me fëmijët e mi. Ata kanë të drejtë të jetojnë. Ndërsa shteti nuk po më ndihmon. Në fakt kam qenë në një qendër mbrojtjeje në Kamëz në vitin 2012 pasi rrihesha nga bashkëshorti im. Por nuk qëndrova më shumë se dy javë. Pastaj kalvari i vuajtjeve të mia nuk ka fund. Nuk maj mend se sa ankesa kam dërguar në zyrat e shtetit. Kam arritur deri atje sa i kam kërkuar Ambasadës së SHBA ndihmë për azil. S`mund të përballoj këtë jetë. Kam vetëm hallin e fëmijëve. Imagjinoni se çfarë heqin gratë e divorcuara. Unë jam shembulli më i gjallë i asaj që ndodh pas shkurorëzimit nga dhuna në familje”, pohon Zhaneta. Tashmë ajo pret që dikush të vendos dorën në zemër nga përfaqësuesit e shtetit. Ka humbur shpresat te drejtësia ndaj saj dhe fëmijëve. “Dua të kontaktoj me gra deputete, kam një fije shprese se ato mund të më kuptojnë më shumë në hallin tim, sëmundjen dhe vuajtjet e mia. Sepse prej disa vitesh kam fituar vetëm indiferencën nga pushtetit”, përfundon ajo.
Divorci
Historia e saj është mjaft e dhimbshme. Ka qenë e martuar me shtetasin Anesti Mëngjesi, me të cilin është shkurorëzuar që prej vitit 2012. Nga martesa ka dy fëmijë, djalin, Valentin dhe vajzën Vasilija. Gjykata e rrethit Gjyqësor, Fier, me një vendim të saj ka zgjidhur martesën mes Zhaneta Petos dhe të pandehurit Anesti Mëngjesi, ndërsa fëmijët i janë lënë për rritje dhe edukim shtetases, Zhaneta Mëngjesi (Peto).
Më datë 24.04.2012, Zhaneta Peto ka bërë kallëzim ndaj ishbashkëshortit të saj, Anesti Mëngjesi, pasi ky i fundit gjatë zhvillimit të seancës gjyqësore me objekt “zgjatje të urdhrit të mbrojtjes”, e ka rrahur kallëzuesen me grushte duke e përplasur në dyshemenë e zyrës së gjykatës.
Ndërsa më 23 prill 2012, po në gjykatë, me gjyqtare Irena Gjoka (Maneku) është zhvilluar seanca gjyqësore me palë ndërgjyqësore Anesti Mëngjesi dhe Zhaneta Peto, pasi kjo e fundit kishte kërkuar zgjatjen e afatit të urdhrit të mbrojtjes. Gjatë kësaj seance gjyqësore, kanë nisur debatet midis palëve në proces, Zhaneta Petos dhe Anesti Mëngjesit, debate të cilat degjeneruan në grindje dhe goditje mes tyre. Nga konflikti ka mbetur i dëmtuar edhe i pandehuri Anesti Mëngjesi.
Për të dy ish- bashkëshortët raportet mjeko-ligjore i klasifikuan me dëmtime të lehta dhe secili prej tyre përfitoi edhe pse të papunë, një raport prej nëntë ditësh paaftësie për punë./Shekulli
