Ka pak orë që shtetasi Fation Skënderi, i njohur si “Toni i Kombinatit”, përfundoi dëshminë e tij në Prokurorinë e Krimeve të Rënda për dosjen “Doshi”. Por ndërkohë dalin në dritë të tjera fakte që hedhin dritë mbi këtë histori, e cila po trazon politikën dhe opionionin publik prej ditësh. Lapsi.al mëson se në datën 8 shtator 2014, me firmën e zv.drejtorit të Policisë së Tiranës, Rebani Jaupaj, shtetasi Fation Skënderi është shpallur në kërkim policor. Ai po hetohej për akuzën “vrasje në rrethana cilësuese e mbetur në tentativë”.
Së bashku me këtë foto që shihni, urdhëri i firmosur nga Jaupaj është shpërndarë në të gjitha pikat e kalimit kufitar të vendit. Por çuditërisht, në po atë ditë (8 shtator 2014), Fation Skënderi është larguar nga Shqipëria nëpërmjet Rinasit në drejtim të Gjermanisë. Kjo verifikohet zyrtarisht edhe në sistemin TiMS.
Nisur nga këto fakte lindin edhe dyshimet e para. Policia e ka lëshuar urdhër-ndalimin për Skënderin, pasi ai është larguar nga Shqipëria, apo përpara se ai të largohej?
Urdhër-ndalimi i policisë së Tiranës për Fation Skënderin është nxjerrë me akuzën “vrasje në rrethana cilësuese e mbetur në tentativë”. Kjo është pikërisht edhe dëshmia që Durim Bami ka dhënë bashkë me deputetin Tom Doshi në zyrën e ministrit të Brendshëm, Saimir Tahiri. Në dëshminë e Bamit, shtetasi Fation Skënderi është përmendur si porositës i vrasjes së Doshit dhe Fufit, në emër të kryeparlamentarit Ilir Meta.
Nisur nga kjo dëshmi, të cilën policia e ka marrë si të mirëqënë, për Fation Skënderin është nxjerrë urdhër ndalimi, kurse Durim Bamin e ka lënë të lirë. Duke i lidhur faktet njëri me tjetrin, shpjegohet qartësisht edhe kërkesa e Fation Skënderit, që kur të mbërrinte në Shqipëri për të dëshmuar, të mos arrestohej nga policia. Pra, ai ishte në dijeni të këtij urdhër-ndalimi që ishte lëshuar për të qysh në datën 8 shtator 2014. Duke mos pasur një urdhër-arresti të lëshuar nga Prokuroria, organi i akuzës s’mund ta arrestonte Fation Skënderin, sepse urdhër-ndalimi i 8 shtatorit 2014 ishte lëshuar nga policia.
Duke qenë se tashmë kjo çështje është marrë nën hetim nga Prokuroria e Krimeve të Rënda, policia nuk mund ta arrestojë më Fation Skënderin pa u lëshuar një urdhër-arresti nga organi i akuzës. Pra, urdher-ndalimi i policisë ka rënë dhe vendos Prokuroria e Krimeve të Rënda se në ç’gjendje do të hetohet shtetasi Fation Skënderi, i njohur si “Toni”.
Si përfundim, faktet të thonë se Fation Skënderi është akuzuar 6 muaj më parë për të njëjtën çështje, që sot po hetohet nga Prokuroria e Krimeve të Rënda. Tani që dosjen “Doshi” po e heton organi i akuzës, i takon atij të vendosë se cfarë do të bëjë me “Tonin e Kombinatit”, një nga dy personat kyç në këtë çështje. Në 6 mars, drejt Mynihut ku jeton Fation Skënderi, udhëtoi deputeti Spartak Braho, një prej njerëzve të afërt të Ilir Metës, që shfaqet më shumë në momente krizash të kreut të LSI-së. Misioni i këtij udhëtimi të “mistershëm” nuk dihet, siç nuk dihet nëse Braho është takuar me “Tonin” dhe a e ka garantuar atë që të kthehet për të dëshmuar se askush nuk do ta prekë./Lapsi.al/
