Deputetja shqiptare nga radhët e BDI-së në Parlamentin e Maqedonisë, Ermira Mehmeti, përmes një postimi në Facebook, ka thënë ato që pritej të dëgjoheshin prej kohësh.
Ajo e ka bërë publik emrin e vajzës zëri i së cilës dëgjohet në bisedën telefonike me përmbajtje intime, të publikuar muaj më parë, e cila u atribuohej asaj dhe kolegut të saj partiek, ish zëvendës-kryeministrit të Maqedonisë, Musa Xhaferi.
Deputetja Ermira Mehmeti shkruan gjithashtu se qysh prej publikimit të bisedës telefonike, ajo ka mbetur e vetme dhe pa përkrahjen e partisë së saj, BDI-së.
“…sot kam vendosur të them disa fjalë lidhur me këtë sulm, që duket se akoma vazhdon. Së pari, është e qartë tendenca që, duke përdorur metodat më të thjeshta të programeve edituese Ermira Mehmeti të shndërrohet në sinonim të ‘shthurjes morale’ të shoqërisë sonë. Nuk është për t’u çuditur: në një shoqëri maskiliste, me premisa të theksuara të patriarkalizmit dhe logjikës së organizimit shoqëror fisnor ku mashkulli/burri ka fjalën përfundimtare për çdo gjë, një Ermirë është pengesë që duhet eliminuar”, shkruan Mehmeti, transmeton Koha.net.
Ajo tutje thotë se ishte mjaft e lehtë për t’u sulmuar personaliteti i saj, ngase ajo nuk i kishte 100 burra prapa për ta mbrojtur.
“Rrethanat lehtësuese? Ermirës i ka vdekur babai, ka një vëlla që merret me art, pra jo me politikë, dhe një vëlla që është ndër udhëheqësit e Revolucionit të larmë. Ajo ka një kushërirë e cila pa ndalë e sulmon BDI-në dhe Qeverinë, dhe ka një familje pa 100 burra (sepse duket se ky është kriteri përcaktues për sukses në politikën tonë aktualisht)! Për më shumë, Ermira është edhe e divorcuar, kështu që terreni për ta goditur në dimensionin moral është perfekt, pa asnjë pengesë!”, deklarohet Mehmeti.
Ajo tregon se duke u gjendur pa mbrojtje nga institucionet por as nga subjekti i saj politik, është detyruar që vetë të kërkoj që të bëhet ekspertiza e ‘përgjimit’, në rrugë private.
“Atë ekspertizë e kanë bërë inxhinierë të zërit nga Maqedonia, Kosova, dhe SHBA-të, dhe është parë qartë se bëhet fjalë për një bisedë të montuar, me qëllim diskreditimin tim”, thotë Mehmeti duke treguar se të njëjtat prova i ka dorëzuar në të gjitha organet e drejtësisë në vend, përfshirë edhe ministra e shefa policie.
“Gjatë gjithë kësaj kohe nuk kam folur për këtë çështje duke u nisur nga edukata ime dhe përcaktimi se roli im publik nuk është për t’ia prishur jetën askujt, aq më pak ndonjë vajze apo femre. Por, sot po them dy gjëra: zonjusha në fjalë është A.A. nga Shkupi, dhe unë, por edhe Prokuroria Speciale e Ministria e Brendshme e kemi fotografinë e saj”, shkruan deputetja Mehmeti, duke shtuar se nuk ka dyshi m se qëllimi i kësaj fushate ka qenë dhe ngelet largimi i saj nga skena politike.
Fundin e shënimit të saj në Facebook, deputetja Ermira Mehmeti e përmbyll me këto fjalë:
“Kjo nuk është politika që unë di ta bëj, nuk është politika që e kam mësuar, dhe nuk është politika në të cilën do të vazhdoj të jap kontribut. Prandaj, do të kërkoja që të ndërpritet fushata kundër meje dhe të lihet e qetë familja ime”.
Në kohën e publikimit të bisedës telefonike, deputetja Mehmeti kishte thënë se bëhet fjalë për montazh të zëri të saj, por pastaj nuk ka folur shumë për këtë temë, pasi me çështjen do të merreshin hetuesia dhe prokuroria.
