Ministri i Jashtëm Enver Hoxhaj është nisur për në Beograd, ku pritet të marrë pjesë nesër (e enjte) në Konferencën e Ministrave të Jashtëm të Ballkanit Perëndimor, në kushte të barabarta me shtetet e tjera.
Në këtë konferencë pritet të flitet për bashkëpunimin rajonal mes shteteve dhe për bashkëpunim ekonomik.
Vizita e Hoxhajt në Serbi është e para vizitë që një ministër i Kosovës bën në shtetin serb.
Ja çfarë thuhet në njoftimin për media të Ministrisë së Jashtme të Kosovës për vizitën e Hoxhajt në Beograd
Qëllimi i kësaj vizite është që të marrë pjesë në një konferencë në nivel të ministrave të jashtëm të vendeve të Ballkanit Perëndimor, ku ne do të diskutojmë për çështjet e bashkëpunimit rajonal dhe të bashkëpunimit ekonomik. Për më tepër, kjo vizitë flet për atë që procesi i normalizimit të marrëdhënieve në mes të Kosovës dhe Serbisë si dy shtete sovrane dhe të pavarura është në një fazë të rëndësishme të tij dhe se Qeveria e Republikës së Kosovës është e përkushtuar për vazhdimin e dialogut deri në normalizimin e plotë të marrëdhënieve ndërshtetërore në mes të vendeve tona.
